गेवराई (प्रतिनिधी विष्णू गायकवाड) : अत्यंत हलाखीची आर्थिक परिस्थिती आणि त्यातच पॅरालिसिस (पक्षाघात) या गंभीर आजाराने त्रस्त असलेल्या बक्षू शेख यांच्या मदतीसाठी ‘हिमायत फाउंडेशन’ पुढे सरसावले आहे. फाउंडेशनच्या वतीने त्यांच्या उपचारासाठी २५ हजार रुपयांचा धनादेश सुपूर्द करण्यात आला.
बक्षू शेख हे गेल्या काही काळापासून पॅरालिसिसने आजारी असून त्यांची आर्थिक परिस्थिती अत्यंत बिकट झाली आहे. उपचारासाठी आवश्यक आर्थिक साधनांची कमतरता असल्याने ते घरीच उपचाराविना पडून होते. दरम्यान, सोशल मीडियाच्या माध्यमातून त्यांनी हिमायत फाउंडेशनच्या सामाजिक कार्याची माहिती घेत मदतीसाठी लेखी अर्ज केला.
अर्ज प्राप्त होताच फाउंडेशनच्या पदाधिकाऱ्यांनी प्रत्यक्ष त्यांच्या घरी भेट देऊन परिस्थितीची पाहणी केली. वस्तुस्थितीची खात्री झाल्यानंतर तातडीची बैठक घेण्यात आली. बैठकीत सर्व सदस्यांनी एकमताने बक्षू शेख यांना २५ हजार रुपयांची मदत देण्याचा ठराव मंजूर केला.
त्यानुसार आज त्यांना प्रत्यक्ष धनादेश सुपूर्द करण्यात आला. सध्या त्यांच्यावर सुलतानपूर येथे उपचार सुरू आहेत.
यावेळी फाउंडेशनचे सचिव शेख मुजीब म्हणाले, “हिमायत फाउंडेशन नेहमीच गोरगरीब आणि गरजूंच्या मदतीसाठी तत्पर असते. समाजाचा आमच्यावर मोठा विश्वास असून भविष्यातही सामाजिक कार्यात आम्ही अग्रेसर राहू.”
या प्रसंगी अध्यक्ष शाहरुख कुरेशी (मुफ्ती उमर), उपाध्यक्ष सय्यद सोहेल, सचिव शेख मुजीब, सहसचिव सय्यद शाकेर, प्रसिद्धी प्रमुख काझी अमान तसेच इतर पदाधिकारी व सदस्य मोठ्या संख्येने उपस्थित होते.
