Times Of Maharashtra Desk : परभणी महानगरपालिकेच्या महापौर व उपमहापौर पदासाठी आज पार पडलेल्या निवडणुकीत महाविकास आघाडीने स्पष्ट बहुमतासह सत्ता आपल्या हातात घेतली आहे. उद्धव ठाकरे गटाच्या शिवसेनेचे सय्यद इकबाल सय्यद खाजा यांनी महापौरपदावर विजय मिळवला, तर उपमहापौरपदी काँग्रेसचे गणेश देशमुख यांची निवड झाली.
निवडणुकीपूर्वीच शिवसेना (उबाठा) आणि काँग्रेस यांच्यातील सत्तावाटपाचे समीकरण निश्चित झाले होते. त्यानुसार महापौरपद शिवसेनेकडे, तर उपमहापौरपद काँग्रेसकडे देण्याचा निर्णय घेण्यात आला होता. या करारानुसार दोन्ही पक्षांनी अधिकृत उमेदवार जाहीर करत आपल्या नगरसेवकांना व्हीप बजावला होता.
महापौर निवडीसाठी हात उंचावून मतदान घेण्यात आले. या मतदानात शिवसेनेचे सय्यद इकबाल सय्यद खाजा यांना 39 मते मिळाली, तर भाजपचे उमेदवार तिरुमला मोकिंद खिल्लारे यांना 26 मतांवर समाधान मानावे लागले. स्पष्ट बहुमताच्या जोरावर सय्यद इकबाल यांनी महापौरपद पटकावले.
या निवडणुकीत राष्ट्रवादी काँग्रेसचे नगरसेवक अक्षय देशमुख आणि रजिया बेगम यांनी भाजपला मतदान न केल्याने राजकीय चर्चांना उधाण आले आहे. ही भूमिका महाविकास आघाडीच्या विजयात निर्णायक ठरल्याचे मानले जात आहे.
निवडणुकीपूर्वी शिवसेना आणि काँग्रेसचे एकूण 37 नगरसेवक एकत्रितपणे एका बसमधून महानगरपालिकेच्या सभागृहाकडे रवाना झाले होते. दोन्ही पक्षांचे नगरसेवक एकाच वाहनातून सभागृहात पोहोचल्याने आघाडीतील एकजूट सर्वांसमोर ठळकपणे दिसून आली. मतदानापूर्वी मोरया लॉन्स येथील सभागृहात नगरसेवकांची बैठक झाली आणि त्यानंतर अधिकृत निवड प्रक्रिया पार पडली.
दरम्यान, उपमहापौर पदासाठी झालेल्या निवडणुकीत काँग्रेसचे गणेश देशमुख यांनी राष्ट्रवादी काँग्रेसच्या नाजमा अब्दुल रहीम यांचा 10 मतांनी पराभव केला. गणेश देशमुख यांना 37 मते मिळाली, तर नाजमा रहीम यांना 27 मते मिळाली. या निवडणुकीत राष्ट्रवादीचे नगरसेवक अक्षय देशमुख यांनी तटस्थ भूमिका घेतली.
महापौर आणि उपमहापौर दोन्ही पदांवर विजय मिळाल्याने महाविकास आघाडीच्या गोटात उत्साहाचे वातावरण असून परभणी महापालिकेत आता आघाडीचे वर्चस्व अधिक मजबूत झाले आहे.
परभणी महापालिका – संख्याबळ
-
एकूण जागा : 65
-
शिवसेना (ठाकरे गट) : 25
-
काँग्रेस : 12
-
भाजप : 12
-
राष्ट्रवादी काँग्रेस : 11
-
जनसुराज्य शक्ती : 3
-
यशवंत सेना : 1
-
इतर : 1
