Times of Maharashtra Desk, Pune : पुणे महानगरपालिकेच्या अधिकृत वाहनतळांवर खासगी ठेकेदारांकडून नागरिकांची दिवसाढवळ्या लूट सुरू असल्याचा धक्कादायक प्रकार उघडकीस आला आहे. महापालिकेने ठरवून दिलेल्या दरांपेक्षा तब्बल पाचपट अधिक शुल्क आकारून ही मनमानी वसुली केली जात आहे. या गंभीर प्रकाराकडे मात्र महापालिका प्रशासनाचे पूर्णपणे दुर्लक्ष होत असल्याचे चित्र आहे.
मिळालेल्या माहितीनुसार, पुणे महापालिकेने शहरातील वाहनतळांसाठी दर निश्चित केलेले आहेत. यानुसार, दुचाकी वाहनासाठी प्रतितास दोन रुपये आणि चारचाकी वाहनासाठी प्रतितास चौदा रुपये असा अधिकृत दर आहे. परंतु, या नियमांना केराची टोपली दाखवत ठेकेदाराचे कर्मचारी नागरिकांकडून जबरदस्तीने जादा पैसे उकळत आहेत. उपलब्ध माहितीनुसार,दोन रुपयांऐवजी दुचाकीसाठी प्रतितास वीस ते तीस रुपये घेतले जात आहेत. तर, चौदा रुपये दर असलेल्या चारचाकीसाठी चक्क साठ ते सत्तर रुपये प्रतितास वसूल केले जात आहेत.
महापालिकेच्या विविध वाहनतळांमध्ये प्रतितास आकारले जाणारे दर
(निश्चित दर: दुचाकी दोन रु. व चारचाकी चौदा रु.)
१. कै. सतीशशेठ धोंडीबा मिसाळ वाहनतळ, मंडई : चारचाकी साठ ते सत्तर रुपये (प्रतितास)
२. हरिभाऊ साने वाहनतळ, नारायण पेठ : दुचाकी तीन रु. व चारचाकी चौदा रु. (प्रतितास)
३. शिवाजीराव आढाव वाहनतळ, नारायण पेठ : दुचाकी दहा रु. व चारचाकी वीस रु. (प्रतितास)
४. हुतात्मा बाबू गेनू वाहनतळ, महात्मा फुले मंडई : दुचाकी तीस रुपये
शहराच्या मध्यवर्ती भागातील बाजारपेठांमध्ये किंवा इतर गर्दीच्या ठिकाणी कामानिमित्त येणाऱ्या हजारो नागरिकांना या लुटीचा फटका बसत आहे. ठेकेदारांची ही मनमानी आणि उघड लूट सुरू असतानाही, पुणे महापालिका प्रशासन यावर कोणताही ठोस कारवाई करताना दिसत नाही. प्रशासनाच्या या निष्क्रियतेमुळेच ठेकेदारांचे फावत असून, सामान्य पुणेकरांच्या खिशाला मात्र मोठी कात्री लागत आहे. या संपूर्ण प्रकारामुळे नागरिक त्रस्त आहेत.
