Times of Maharashtra Desk, Pune : उपमुख्यमंत्री अजित पवार यांचे पुत्र पार्थ पवार हे पुण्यातील एका जमीन व्यवहारामुळे वादात सापडले आहेत. पार्थ पवार यांच्या ‘अमेडिया होल्डिंग्स एलएलपी’ या कंपनीने कोरेगाव पार्क परिसरातील तब्बल अठराशे कोटी रुपये बाजारमूल्य असलेली ‘महार वतन’ जमीन अवघ्या तीनशे कोटी रुपयांना खरेदी केल्याचा गंभीर आरोप शिवसेना ठाकरे गटाचे नेते अंबादास दानवे यांनी केला आहे. या संपूर्ण व्यवहारात केवळ स्टॅम्प ड्युटी बुडवली नाही, तर ती अवघ्या अठ्ठेचाळीस तासांत माफही करण्यात आल्याचा दावा करत, या प्रकरणी सामाजिक कार्यकर्त्या अंजली दमानिया यांनीही पवार पितापुत्रांवर थेट निशाणा साधला आहे.
काय आहेत आरोप ?
पुण्यातील कोरेगाव पार्क भागातील चाळीस एकर ‘महार वतन’ जमिनीचे बाजारमूल्य सुमारे अठराशे कोटी रुपये असल्याचा दावा आहे. मात्र, पार्थ पवार संचालक असलेल्या अमेडिया होल्डिंग्स या कंपनीने ही जमीन केवळ तीनशे कोटी रुपयांना खरेदी केली. अंबादास दानवे यांनी आरोप केले आहे की,
ज्या कंपनीने हा तीनशे कोटींचा व्यवहार केला, त्या अमेडिया होल्डिंग्स कंपनीचे भांडवल अवघे एक लाख रुपये आहे. एवढ्या कमी भांडवलावर एवढा मोठा व्यवहार कसा झाला ?
अंजली दमानिया यांनी आरोप केला आहे की, तीनशे कोटींच्या व्यवहारावर नियमानुसार सुमारे एकवीस कोटी रुपये स्टॅम्प ड्युटी भरणे अपेक्षित होते. त्यांच्या मते अठराशे कोटींच्या मूळ मूल्यावर एकशे सव्वीस कोटी स्टॅम्प ड्युटी होते. मात्र, कंपनीने या जागेवर आयटी पार्क आणि डेटा सेंटर उभारण्याचा ठराव बावीस एप्रिल रोजी केल्यानंतर, अवघ्या अठ्ठेचाळीस तासांत उद्योग संचालनालयाने या प्रकल्पावरील स्टॅम्प ड्युटी माफ केली. या संपूर्ण चाळीस एकर जमिनीच्या व्यवहारासाठी केवळ पाचशे रुपये स्टॅम्प ड्युटी भरण्यात आल्याचा गंभीर आरोप दमानिया आणि दानवे यांनी केला आहे. ही जमीन ‘महार वतन’ प्रकारातील असून, ‘बॉम्बे इन्फिरियर व्हिलेज वतन्स अबॉलिशन ॲक्ट, १९५८’ नुसार अशी जमीन सरकारच्या परवानगीशिवाय विकता, हस्तांतरित करता किंवा गहाण ठेवता येत नाही. ही जमीन पुणे जिल्हाधिकाऱ्यांच्या ताब्यात असताना आणि शासनासोबत सुनावणी सुरू असताना हा व्यवहार झाल्याचा आरोप आहे.
विरोधकांची टीका आणि मागण्या
अंबादास दानवे यांनी “फुले-शाहू-आंबेडकरांचे नाव घ्यायचे आणि महार वतनाच्या जमिनी खिशात घालायच्या, हाच अजित दादांचा पुरोगामी महाराष्ट्र आहे,” अशी खोचक टीका केली आहे. अंजली दमानिया यांनी या प्रकरणाची तुलना एकनाथ खडसे यांच्या भोसरी जमीन प्रकरणाशी केली असून, मुख्यमंत्री देवेंद्र फडणवीस आता अजित पवारांवर कारवाई करणार का, असा सवाल विचारला आहे. त्यांनी या प्रकरणी अजित पवार यांच्या राजीनाम्याचीही मागणी केली आहे. काँग्रेस नेते विजय वडेट्टीवार यांनीही सरकारी नियम वाकवून हा व्यवहार झाल्याचा आरोप करत, हा व्यवहार रद्द करण्याची आणि पारदर्शक चौकशीची मागणी केली आहे.
या गंभीर आरोपांमुळे राज्याच्या राजकारणात खळबळ उडाली असून, या संपूर्ण प्रकरणाच्या सखोल चौकशीची मागणी विरोधकांकडून केली जात आहे.
