Times of Maharashtra Desk, Pune Crime : पुणे शहरातील गजबजलेल्या बाजीराव रस्त्यावर भरदिवसा एका तरुणाची धारदार शस्त्राने वार करून निर्घृण हत्या करण्यात आल्याची धक्कादायक घटना घडली आहे. मयंक खराडे असे हत्या झालेल्या तरुणाचे नाव आहे. या घटनेमुळे संपूर्ण पुणे शहरात खळबळ उडाली असून, कायदा आणि सुव्यवस्थेवर प्रश्नचिन्ह निर्माण झाले आहे.
मयंक हा त्याच्या अभिजीत इंगळे नामक मित्रासोबत दुचाकीवरून बाजीराव रस्त्यावरून जात होता. त्यावेळी, जनता वसाहत, महाराणा प्रताप उद्यानाजवळ दखनी मिसळजवळ येथे दबा धरून बसलेल्या हल्लेखोरांनी त्यांच्यावर अचानक हल्ला चढवला. अज्ञात व्यक्तींनी मयंकवर कोयत्याने सपासप वार केले. हा हल्ला इतका अनपेक्षित होता की, मयंकला व त्याच्या मित्राला पळून जाण्याची वा प्रतिकार करण्याची संधीच मिळाली नाही.
या भ्याड हल्ल्यात मयंक खराडे याचा जागीच मृत्यू झाला, तर त्याचा मित्र जखमी झाला असून, त्याच्यावर रुग्णालयात उपचार सुरू आहेत. दिवसाढवळ्या घडलेल्या या हत्येच्या थरारामुळे रस्त्यावरील नागरिकांची पळापळ झाली आणि परिसरात भीतीचे वातावरण पसरले.
घटनेची माहिती मिळताच, स्थानिक पोलिसांनी तातडीने घटनास्थळी धाव घेतली आणि पंचनामा केला. पोलिसांनी या प्रकरणाचा तपास वेगाने सुरू केला आहे. आरोपींचा शोध घेण्यासाठी परिसरातील सीसीटीव्ही फुटेज तपासण्याचे काम सुरू आहे. हा हल्ला पूर्ववैमनस्यातून झाला असावा, असा प्राथमिक अंदाज पोलिसांनी व्यक्त केला आहे. या घटनेने पुण्याच्या कायदा आणि सुव्यवस्थेला मोठे आव्हान निर्माण झाले आहे.
