Times of Maharashtra Desk: पुण्यातील विश्रांतवाडी परिसरातून बेपत्ता झालेल्या १७ वर्षीय अल्पवयीन मुलाचा अपहरण करून खून करण्यात आल्याचा धक्कादायक प्रकार उघडकीस आला आहे. खेड शिवापूर परिसरातील डोंगरात बुधवारी दुपारी या मुलाचा मृतदेह आढळून आला. अमनसिंग सुरेंद्रसिंह गचंड (वय १७, रा. टिंगरेनगर, विश्रांतवाडी) असे खून झालेल्या मुलाचे नाव आहे.या प्रकरणी पोलिसांनी आतापर्यंत पाच जणांना ताब्यात घेतले असून त्यामध्ये दोन अल्पवयीन आरोपींचा समावेश आहे. मुख्य आरोपी प्रथमेश चिंधू आढळ (वय १९, रा. उत्तमनगर) आणि नागेश बालाजी धबाले (वय १९, रा. शिवणे) यांना अटक करण्यात आली असून न्यायालयाने त्यांना ९ जानेवारीपर्यंत पोलिस कोठडी सुनावली आहे. विश्रांतवाडी पोलिस ठाण्यात एकूण ११ जणांविरोधात गुन्हा दाखल करण्यात आला आहे.
जुन्या वादातून खुनाचा कट
पोलिस तपासानुसार, सप्टेंबर २०२५ मध्ये अमनसिंग आणि प्रथमेश यांच्यात वाद झाला होता. त्या वादात अमनसिंगकडून झालेल्या मारहाणीत प्रथमेश जखमी झाला होता. याच रागातून प्रथमेशने अमनसिंगचा खून करण्याचा कट रचल्याचे तपासात निष्पन्न झाले आहे.अमनसिंग विश्रांतवाडी परिसरात राहत असल्याची माहिती मिळाल्यानंतर आरोपींनी सोशल मीडियाचा वापर करून त्याला सापळ्यात ओढले. एका तरुणीच्या नावाने इन्स्टाग्रामवर संपर्क साधून २९ डिसेंबर रोजी त्याला खेड शिवापूर येथील वर्तुमुख मंदिर परिसरात बोलावण्यात आले.
खेड शिवापूरच्या डोंगरात हत्या
अमनसिंग मंदिरात दर्शन घेतल्यानंतर आरोपींनी त्याला डोंगर परिसरात नेले. तेथे आधीच कटात सहभागी असलेले इतर आरोपी उपस्थित होते. चौकशीत समोर आलेल्या माहितीनुसार, आरोपींनी अमनसिंगला शेवटची इच्छा विचारली होती. त्यानंतर त्याच्यावर धारदार शस्त्राने हल्ला करून आणि दगडाने ठेचून निर्घृणपणे हत्या करण्यात आली. मृतदेह खड्ड्यात पुरून आरोपी फरार झाले.
बेपत्ता तक्रारीनंतर उघडकीस आले प्रकरण
२९ डिसेंबर रोजी सकाळी घरातून बाहेर पडलेला अमनसिंग रात्री उशिरापर्यंत घरी न परतल्याने कुटुंबीयांनी शोधाशोध सुरू केली. दुसऱ्या दिवशी त्याच्या आईने विश्रांतवाडी पोलिस ठाण्यात बेपत्ता झाल्याची तक्रार दाखल केली. गुन्हे शाखा युनिट-३ आणि विश्रांतवाडी पोलिसांनी समांतर तपास करत कर्नाटकातील बेळगाव येथून मुख्य आरोपींना ताब्यात घेतले.चौकशीत आरोपींनी खुनाची कबुली दिल्यानंतर बुधवारी सायंकाळी खेड शिवापूरच्या डोंगरात खड्ड्यात पुरलेला मृतदेह बाहेर काढण्यात आला. मृतदेहाची अवस्था अत्यंत खराब झालेली होती.या प्रकरणाचा पुढील तपास विश्रांतवाडी पोलीस आणि गुन्हे शाखा करत आहेत.
