ही घटना ९ नोव्हेंबर २०२४ ते १९ नोव्हेंबर २०२४ या कालावधीत घडली. अनोळखी व्हॉट्सअॅप नंबरवरून फिर्यादीला फोन करून स्वतःला पोलीस अधिकारी असल्याचे भासवून त्यांच्यावर मनी लॉन्ड्रिंगचा आरोप असल्याचे सांगण्यात आले. चौकशीच्या नावाखाली त्यांना सातत्याने धमकावून, भीती दाखवून, पैसे वेगवेगळ्या खात्यांत पाठवण्यास भाग पाडण्यात आले. एकूण ६.२९ कोटी रुपये आरोपीच्या खात्यात वर्ग करण्यात आले.
पोलिस तपासात समोर आले की, फसवणुकीनंतर आरोपीने एचडीएफसी बँकेतून संबंधित रकमेपैकी काही भागावर फिक्स डिपॉझिट केली होती. बँक खाते ‘श्री धावीर कन्स्ट्रक्शन’च्या नावावर असून, आरोपी बांधकाम व्यवसायिक आहे.
पोलिसांनी कोकबन (ता. रोहा, जि. रायगड) येथे शोधमोहीम राबवून तपास सुरू ठेवला. आरोपीस आपल्या मागे पोलीस लागल्याचे समजल्याने तो पळून गेला होता. मात्र, गुप्त बातमीदारामार्फत तुषार वाजंत्री हा पनवेलमध्ये असल्याची माहिती मिळाल्यानंतर सायबर पोलिसांचे पथक रात्रीच्या वेळी पावसात प्रवास करून मोर्वे गावातील ऐश्वर्या रिसॉर्ट परिसरातून आरोपीस अटक करण्यात यशस्वी झाले.
तुषार वाजंत्री याला अटक करून न्यायालयात हजर केले असता त्याला ५ दिवसांची पोलीस कोठडी मिळाली. तपासात आरोपींच्या विरोधात देशभरात नॅशनल सायबर क्राईम पोर्टलवर पाच तक्रारी नोंद असल्याचे समोर आले आहे. त्याचे वडील हरिश्चंद्र वाजंत्री सध्या फरार असून त्यांचा शोध सुरू आहे.
ही कारवाई पोलीस आयुक्त अमितेशकुमार सो, सह आयुक्त रंजनकुमार शर्मा, अपर आयुक्त पंकज देशमुख आणि उपआयुक्त विवेक मासाळ यांच्या मार्गदर्शनाखाली करण्यात आली. वरिष्ठ पोलीस निरीक्षक स्वप्नाली शिंदे आणि त्यांच्या पथकाने ही उल्लेखनीय कामगिरी बजावली.
