Times Of Maharashtra Desk : पुणे शहरातील महापालिका रुग्णालयांच्या सेवा अधिक सक्षम, सुसज्ज आणि नागरिकाभिमुख करण्याच्या दृष्टीने उपमहापौर परशुराम वाडेकर यांच्या अध्यक्षतेखाली महत्त्वपूर्ण आढावा बैठक पार पडली. या बैठकीस अति. आयुक्त पवनीत कौर, आरोग्य अधिकारी डॉ. नीना बोऱाडे यांच्यासह विविध विभागांचे वरिष्ठ अधिकारी उपस्थित होते.
बैठकीत शहरातील प्रलंबित कामे, वैद्यकीय उपकरणांची उपलब्धता, इमारतींची दुरुस्ती आणि सेवा विस्तार यावर सविस्तर चर्चा करण्यात आली. बोपोडी येथील संजय गांधी रुग्णालय हे पूर्णपणे महापालिकेमार्फत चालवून अत्याधुनिक मल्टीस्पेशालिटी रुग्णालय म्हणून विकसित करण्याचा निर्णय घेण्यात आला. तसेच औंध रोडवरील कै. बाबुराव गेनबा शेवाळे रुग्णालय येथे दुरुस्ती करून सेवा वाढविण्यात येणार आहे.
बैठकीनंतर उपमहापौरांनी दुपारी संबंधित अधिकाऱ्यांसह प्रत्यक्ष रुग्णालयांना भेट देत सुधारणा कामांना तात्काळ प्रारंभ करण्याचे आदेश दिले. गोरगरिबांना परवडणारी व दर्जेदार आरोग्य सेवा देण्यासाठी प्रशासन कटिबद्ध असल्याचे त्यांनी स्पष्ट केले.
