Times Of Maharashtra Desk : राज्यातील अनेक महानगरपालिकांमध्ये अद्याप सत्तास्थापनेचा तिढा कायम असतानाच पुणे महानगरपालिकेत महापौर निवडीसाठी हालचालींना वेग आला आहे. पुणे महापालिकेच्या महापौर, उपमहापौर आणि स्थायी समिती अध्यक्षपदासाठी येत्या 6 फेब्रुवारी रोजी विशेष सर्वसाधारण सभेचे आयोजन करण्यात आले आहे.
6 फेब्रुवारी रोजी सर्वसाधारणसभेचे आयोजन
महापालिका आयुक्त नवलकिशोर राम यांच्या आदेशानुसार ही विशेष सभा 6 फेब्रुवारी रोजी सकाळी 11 वाजता पार पडणार आहे. या सभेत महापौर आणि उपमहापौर पदाची निवड केली जाणार असून, त्याचबरोबर स्थायी समिती अध्यक्षाचाही निर्णय होणार आहे. पुणे महानगरपालिकेच्या एकूण 165 जागांपैकी 119 जागांवर भाजपचे नगरसेवक निवडून आले असल्याने भाजपकडे स्पष्ट बहुमत आहे. त्यामुळे महापौर आणि उपमहापौरपदावर भाजपचाच उमेदवार विराजमान होणार हे जवळपास निश्चित मानले जात आहे. मात्र, विरोधी पक्ष उमेदवार उभे करणार की या निवडी बिनविरोध होतील, याकडे राजकीय वर्तुळाचे लक्ष लागले आहे.
एक बंगला बने न्यारा
नव्या महापौरांच्या स्वागतासाठी पुण्यातील ऐतिहासिक महापौर बंगला सज्ज करण्यात येत आहे. राज्यात 2022 नंतर महानगरपालिकांच्या निवडणुका न झाल्याने पुण्याला अद्याप नवा महापौर मिळालेला नव्हता. त्यामुळे आता या बंगल्यात रंगकाम तसेच फर्निचरचे काम सुरू करण्यात आले आहे.
हा महापौर बंगला पुण्याच्या बदलत्या इतिहासाचा साक्षीदार ठरला आहे. शहराच्या विकासाशी संबंधित अनेक महत्त्वाचे निर्णय सर्वप्रथम याच बंगल्यात चर्चेसाठी घेतले गेले आहेत. पुण्याच्या बदलत्या स्वरूपाचा तो साक्षीदार मानला जातो.
यंदा पुण्यात महिला महापौर असणार हे जवळपास निश्चित झाले आहे. महापौरपदाची माळ कोणाच्या गळ्यात पडणार, तसेच पुण्यात उपमुख्यमंत्री देवेंद्र फडणवीस कोणत्या ‘लाडक्या बहिणीला’ संधी देतात, हे काही दिवसांत स्पष्ट होणार आहे. त्यानंतर पुन्हा एकदा वाजत-गाजत नवा महापौर या बंगल्यात वास्तव्यास येणार आहे.
पुणे महानगरपालिकेतील पक्षनिहाय संख्याबळ
-
एकूण जागा : 165
-
भाजप : 119
-
शिवसेना (शिंदे गट) : 0
-
शिवसेना (उद्धव ठाकरे गट) : 1
-
राष्ट्रवादी काँग्रेस (शरद पवार गट) : 3
-
राष्ट्रवादी काँग्रेस (अजित पवार गट) : 27
-
काँग्रेस : 15
-
एमआयएम : 0
-
अपक्ष : 0
-
इतर : 0
