कीर्तन, भजन आणि महाप्रसाद, पाथर्डीत रंगणार संत सेवालाल जयंती उत्सव
विकास चव्हाण ( पुणे प्रतिनिधी ) : बंजारा समाजाचे आराध्य दैवत आणि महान संत सेवालाल महाराज यांचा २८७ वा अवतरण दिन सोहळा पाथर्डी शहरात मोठ्या भक्तीभावात आणि उत्साहात साजरा करण्यात येणार आहे. येत्या १५ फेब्रुवारी २०२६ रोजी होणाऱ्या या भव्य सोहळ्यासाठी जगदंब सेवालाल भक्त मंडळ आणि सकल बंजारा समाज, पाथर्डी यांच्या वतीने जय्यत तयारी पूर्ण करण्यात आली आहे.
पूर्वसंध्येला भक्तिसंगीताचा कार्यक्रम
सोहळ्याची सुरुवात शनिवार, १४ फेब्रुवारी रोजी सायंकाळी ५ वाजता होणार असून रात्री ८ वाजता प्रबोधनकार नामदेव महाराज ठाकरवाडीकर यांच्या सुमधुर बंजारा भजनाचा कार्यक्रम आयोजित करण्यात आला आहे. भक्तिरसाने या कार्यक्रमाची सुरवात होईल कार्यक्रमामुळे परिसरातील वातावरण भक्तिमय होणार आहे. मेजर देवीचंद पवार व पवार परिवाराच्या वतीने भाविकांसाठी महाप्रसाद आयोजित करण्यात आला आहे.
रविवारी मुख्य सोहळ्याची धूम
रविवार, १५ फेब्रुवारी रोजी सकाळी ८ वाजता मुख्य कार्यक्रमास प्रारंभ होईल. शहरातील वसंतराव नाईक चौक येथून जगदंबा देवी व सेवालाल मंदिर (आनंदनगर) पर्यंत ‘सेवालाल लीलामृत ग्रंथ’ आणि पादुकांची भव्य मिरवणूक काढण्यात येणार आहे. पारंपरिक वाद्यांच्या गजरात आणि ‘जय सेवालाल’च्या जयघोषात निघणारी ही मिरवणूक शहराचे लक्ष वेधून घेईल, अशी अपेक्षा आहे.
सकाळी १० वाजता ह.भ.प. शितलताई साबळे पाटील (रामपूरकर) यांचे सुश्राव्य कीर्तन होणार असून त्यांना गानकोकीळा नंदिनीताई सांगळे, पांडुरंग महाराज आळंदी आणि संस्थेतील विद्यार्थी संगीत साथसंगत करणार आहेत. कीर्तनानंतर दुपारी १२ वाजता मेजर देवीचंद पवार व पवार परिवाराच्या सौजन्याने भाविकांना महाप्रसाद व फराळाचे वाटप करण्यात येईल.
उपस्थितीचे आवाहन
या पवित्र आणि ऐतिहासिक सोहळ्याचा लाभ घेण्यासाठी सर्व समाजबांधवांनी व भाविकांनी मोठ्या संख्येने उपस्थित राहावे, असे आवाहन श्री वसंतराव नाईक वाचन मंदिर व जगदंब सेवालाल भक्त मंडळाच्या वतीने करण्यात आले आहे.
पाथर्डी शहरात संत सेवालाल महाराजांच्या अवतरण दिनानिमित्त भक्ती, परंपरा आणि सामाजिक ऐक्याचा अनोखा संगम अनुभवायला मिळणार आहे.
