जळगाव : (प्रतिनिधी- विनोद पवार)जळगाव शहरात शुक्रवारी रात्री घडलेल्या भीषण अपघातात ५६ वर्षीय प्रौढाचा दुर्दैवी मृत्यू झाला. मोबाईलवर बोलत भरधाव वेगाने डंपर चालवणाऱ्या चालकाने दुचाकीस्वाराला चिरडल्याची घटना कालीका माता मंदिराजवळ रात्री सुमारे ८ वाजता घडली. या घटनेनंतर परिसरात तणावाचे वातावरण निर्माण झाले असून संतप्त नागरिकांनी डंपरची तोडफोड केली.
रस्त्याने चालणे झाले अवघड
प्रभाकर रघुनाथ पाटील (वय ५६, मूळ रा. तेली चौक, जुने जळगाव, सध्या रा. ज्ञानदेवनगर) असे मृताचे नाव आहे. दिवसभर काबाडकष्ट करून सायंकाळी भाजीपाला घेण्यासाठी ते घराबाहेर पडले होते. दुचाकीवरून जात असताना मोबाईलवर बोलत आणि गाणी ऐकत भरधाव निघालेल्या डंपर चालकाने त्यांना जोरदार धडक दिली. धडकेनंतर पाटील यांचा जागीच मृत्यू झाला.
बेशीस्त वाहनचालकांवर कठोर कारवाईची मागणी
अपघाताची माहिती मिळताच नागरिक मोठ्या संख्येने घटनास्थळी जमा झाले. संतप्त जमावाने डंपरच्या काचा फोडून वाहनाचे नुकसान केले. काही काळ वाहतूक ठप्प झाली होती. पोलिसांनी तातडीने घटनास्थळी धाव घेत परिस्थिती नियंत्रणात आणली व मृतदेह शवविच्छेदनासाठी जिल्हा रुग्णालयात पाठवला.
दरम्यान, याच ठिकाणी महिनाभरात झालेली ही दुसरी गंभीर घटना असल्याचे स्थानिकांनी सांगितले. वाढत्या बेदरकार वाहनचालकांवर कठोर कारवाई करावी, अशी मागणी नागरिकांकडून होत आहे. संबंधित डंपर चालकाविरोधात गुन्हा दाखल करण्यात आला असून पुढील तपास सुरू आहे.
