सिन्नर (नवनाथ आव्हाड ) :
सिन्नरमध्ये खळबळजनक घटना : वावी वेस भागात सख्ख्या भावांवर चाकूने हल्ला — एकाचा मृत्यू, एक गंभीर जखमी
सिन्नर शहरातील वावी वेस परिसरात रविवारी रात्री उशिरा दोन सख्ख्या भावांवर चाकूने हल्ला झाल्याची धक्कादायक घटना घडली असून या हल्ल्यात गौरव जाधव यांचा मृत्यू झाला आहे. तर दुसरा भाऊ गंभीर जखमी झाला असून त्याच्यावर उपचार सुरू आहेत. या घटनेमुळे सिन्नर शहरात एकच खळबळ उडाली आहे.
मिळालेल्या माहितीनुसार, सिन्नर शहरात श्रीराम रथ मिरवणूक मोठ्या उत्साहात सुरू होती. ही मिरवणूक वावी वेस परिसरातून पुढे गेल्यानंतर काही वेळातच दोन गटांमध्ये वाद निर्माण झाला. रथ मिरवणूक एका घरासमोर येत असताना गाडी पार्किंगवरून वाद उफाळल्याची प्राथमिक माहिती समोर आली आहे. मिरवणूक पुढे गेल्यानंतर अंधाराचा फायदा घेत काही जणांमध्ये जोरदार बाचाबाची झाली आणि त्याचे रूपांतर मारहाणीत झाले.
या वादातूनच दोघा सख्ख्या भावांवर चाकूने हल्ला करण्यात आला. हल्ल्यात गौरव जाधव हे गंभीर जखमी झाले. त्यांना तातडीने उपचारासाठी नाशिक येथे हलविण्यात येत असताना रस्त्यातच त्यांचा मृत्यू झाला. या घटनेत दुसरा भाऊ गंभीर जखमी झाला असून त्याच्यावर सध्या उपचार सुरू आहेत.
दरम्यान, या घटनेत चाकूने हल्ला करणाऱ्या व्यक्तीची पत्नीही जखमी झाल्याची माहिती समोर आली आहे. वाद वाढत असताना ती मध्ये पडल्यामुळे तीही जखमी झाल्याचे सांगितले जात आहे.
घटनेची माहिती मिळताच सिन्नर पोलिसांनी तात्काळ घटनास्थळी धाव घेतली. पोलिसांनी हल्ला करणाऱ्या संशयित व्यक्तीला ताब्यात घेतले असून त्याची चौकशी सुरू आहे. घटनेनंतर वावी वेस परिसरात काही काळ तणावाचे वातावरण निर्माण झाले होते. पोलिसांनी परिसरात बंदोबस्त वाढवून परिस्थिती नियंत्रणात आणली.
या घटनेमागे भाऊबंदकीच्या वादातून हल्ला झाल्याची दबक्या आवाजात चर्चा सुरू आहे. मात्र याबाबत पोलिसांकडून अधिकृत माहिती देण्यात आलेली नाही. पोलिसांकडून घटनेचा अधिक तपास सुरू असून नेमके कारण शोधण्याचे काम सुरू आहे.
श्रीराम रथ मिरवणुकीसारख्या धार्मिक आणि उत्सवी वातावरणात घडलेल्या या घटनेमुळे शहरात हळहळ व्यक्त होत आहे. सिन्नर शहरात शांततेचे वातावरण असताना अचानक घडलेल्या या घटनेमुळे नागरिकांमध्ये भीतीचे वातावरण निर्माण झाले आहे.
दरम्यान, सिन्नर पोलिसांनी नागरिकांना अफवांवर विश्वास न ठेवण्याचे आवाहन केले असून घटनेचा सखोल तपास सुरू असल्याचे सांगितले आहे. पुढील तपास सिन्नर पोलीस करत आहेत.
