तालुका (प्रतिनिधी जाबिर खान) : सिरोंचा शहरात बकरी ईद (ईद-उल-अजहा) मोठ्या उत्साहात, शांततेत आणि धार्मिक वातावरणात साजरी करण्यात आली. आज सकाळी मुस्लिम समाजातील बांधवांनी ईदगाह मैदानात मोठ्या संख्येने उपस्थित राहून ईदची विशेष नमाज अदा केली. नमाजानंतर मुस्लिम धर्मगुरू आलिम साहेब यांनी अत्यंत भावनिक आणि प्रेरणादायी दुआ केली. आपल्या दुआमध्ये त्यांनी संपूर्ण मानवजातीसाठी सुख, शांती, आरोग्य आणि समृद्धीची प्रार्थना केली तसेच सर्व धर्मीयांनी आपापसात बंधुभाव, एकता आणि प्रेमाने राहावे असा संदेश दिला.
यावेळी मुस्लिम समाजातील काही जबाबदार नागरिकांशी संवाद साधला असता त्यांनी ईद-उल-अजहा या सणाचे धार्मिक आणि सामाजिक महत्त्व सविस्तरपणे स्पष्ट केले. हजरत इब्राहिम अलैहिस्सलाम यांच्या त्याग आणि अल्लाहवरील अटळ श्रद्धेच्या स्मरणार्थ हा सण साजरा केला जातो, असे त्यांनी सांगितले. त्याग, मानवता, गरीबांप्रती सहानुभूती आणि समाजात प्रेम वाढविणे हा या पवित्र सणाचा मुख्य उद्देश असल्याचे त्यांनी नमूद केले. तसेच सर्व नागरिकांना बकरी ईदच्या हार्दिक शुभेच्छाही देण्यात आल्या.
वाढत्या उन्हाचा विचार करून MIDK ट्रस्ट कमिटीचे सदर जनाब फाजील पाशा आणि कमिटीतील इतर सदस्यांनी पहाटे ६ वाजल्यापासून ईदगाह परिसरात विशेष व्यवस्था केली. नमाजासाठी आलेल्या ज्येष्ठ नागरिक, लहान मुले आणि इतर नागरिकांना कोणताही त्रास होऊ नये यासाठी सावलीची व्यवस्था, थंड पिण्याच्या पाण्याची सोय तसेच इतर आवश्यक सुविधा उपलब्ध करून देण्यात आल्या. या सामाजिक कार्याबद्दल नागरिकांनी कमिटीचे कौतुक केले.
आजचा दिवस सिरोंचा शहरासाठी आनंद, एकता आणि सामाजिक सलोखा जपणारा ठरला. सर्व धर्मीय नागरिकांनी एकमेकांना शुभेच्छा देत शांतता आणि बंधुभावाचा संदेश दिला.
