ब्रह्मपुरी (प्रतिनिधी रुपेश देशमुख) : आरमोरी मार्गावरील वैनगंगा नदीच्या पुलावर रविवारी रात्री भीषण अपघात घडला असून, मद्यधुंद स्कॉर्पिओ चालकाच्या बेफिकीरपणामुळे एका पोलीस हवालदाराला गंभीर दुखापत झाली आहे. या घटनेमुळे परिसरात एकच खळबळ उडाली आहे.
माहितीनुसार, ब्रह्मपुरी पोलीस ठाण्यात कार्यरत असलेले पोलीस हवालदार कृनाल भाऊराव हेमके (वय ४५, रा. समता कॉलनी, ब्रह्मपुरी) हे रात्री सुमारे ८ वाजण्याच्या सुमारास दुचाकीने आरमोरीकडे जात होते. ते वैनगंगा पुलावर पोहोचताच समोरून येणाऱ्या स्कॉर्पिओने अचानक चुकीच्या दिशेने भरधाव वेगात येत त्यांच्या दुचाकीला जबर धडक दिली. या धडकेत हेमके हे काही अंतरावर फेकले गेले आणि त्यांना गंभीर दुखापत झाली.
प्रत्यक्षदर्शींनी दिलेल्या माहितीनुसार, स्कॉर्पिओ चालक पूर्णतः मद्याच्या नशेत होता. नशेतच त्याने वाहनावर नियंत्रण गमावल्याने हा अपघात घडल्याचे सांगितले जात आहे. अपघातानंतर जखमी हवालदाराला तत्काळ उपचारासाठी रुग्णालयात दाखल करण्यात आले.
या प्रकरणी जखमी हेमके यांच्या पत्नी सौ. भावना हेमके यांनी ब्रह्मपुरी पोलीस ठाण्यात तक्रार दाखल केली आहे. पोलिसांनी आरोपी चालकाविरुद्ध भारतीय न्याय संहिता कलम २८१, १२५ (ब) तसेच मोटार वाहन कायद्यान्वये कलम १८४, १३४, १८५ अंतर्गत गुन्हा नोंदवला आहे.
घटनेचा अधिक तपास पोलीस उपनिरीक्षक बालाजी चव्हाण करत असून, मद्यधुंद वाहनचालकांवर कठोर कारवाईची मागणी नागरिकांकडून केली जात आहे. या अपघाताने पुन्हा एकदा बेफाम वाहनचालकांचा प्रश्न ऐरणीवर आला आहे.
