दौंड (प्रतिनिधी संघराज गायकवाड, मयुर साळवे) : दौंड शहरात क्रांतीसूर्य महात्मा जोतिबा फुले यांच्या जयंतीनिमित्त विविध समाजोपयोगी उपक्रम उत्साहात पार पडले. फुलेनगर येथील महात्मा जोतिबा फुले चौक (दौंड-गोपाळवाडी रोड) येथे आयोजित रक्तदान शिबिराला नागरिकांचा उत्स्फूर्त प्रतिसाद मिळाला. या शिबिरात तब्बल 66 रक्तदात्यांनी स्वेच्छेने रक्तदान करून समाजसेवेचे आदर्श उदाहरण घालून दिले.
कार्यक्रमात तरुणाईपासून ज्येष्ठांपर्यंत मोठ्या संख्येने नागरिक सहभागी झाले होते. रक्तदान शिबिराद्वारे रुग्णांना जीवनदान देण्याचा संकल्प यावेळी व्यक्त करण्यात आला. आयोजकांनी महात्मा फुले यांच्या विचारांना अनुसरून “समता आणि सेवा” हा संदेश समाजापर्यंत पोहोचवण्याचा प्रयत्न केला.
याचबरोबर सरपंच वस्तीतील संविधान तिरंगा चौक येथे नागरिकांसाठी ज्यूस वाटप उपक्रम राबविण्यात आला. वाढत्या उन्हाच्या पार्श्वभूमीवर या उपक्रमाला नागरिकांकडून मोठा प्रतिसाद मिळाला. पादचारी, वाहनचालक तसेच स्थानिक रहिवाशांनी या सेवाभावी उपक्रमाचा लाभ घेत समाधान व्यक्त केले.
महात्मा फुले यांच्या जयंतीनिमित्त राबविण्यात आलेल्या या दोन्ही उपक्रमांमुळे समाजात एकता, सेवा आणि समतेचा संदेश अधिक बळकट झाला आहे. दौंडमधील सामाजिक कार्यकर्त्यांनी भविष्यातही असे उपक्रम सुरू ठेवण्याचा निर्धार व्यक्त केला.
