Times of Maharashtra Desk, Pune : महाराष्ट्र शासनाची स्वायत्त संस्था असलेल्या महाराष्ट्र संशोधन, उन्नती व प्रशिक्षण प्रबोधिनी (अमृत) यांच्यावतीने आयोजित करण्यात आलेल्या ‘अमृत दुर्गोत्सव 2025’ या ऐतिहासिक उपक्रमाने गिनीज वर्ल्ड रेकॉर्डमध्ये आपले नाव कोरले आहे. छत्रपती शिवाजी महाराजांना विश्वविक्रमी मानवंदना देणाऱ्या या उपक्रमाने मानवी हातांनी तयार केलेल्या प्रतिकृतींचा सर्वात मोठा डिजिटल फोटो अल्बम या श्रेणीमध्ये नवा विश्वविक्रम प्रस्थापित केला आहे. हा विक्रम शिवछत्रपतींशी संबंधित लोकसहभागातून गड-दुर्गाचा सन्मान करणारा पहिलाच विश्वविक्रम ठरला आहे. गिनीज वर्ल्ड रेकॉर्ड या जगप्रसिद्ध संस्थेने अमृतचे व्यवस्थापकीय संचालक विजय जोशी यांना या विक्रमाचे अधिकृत प्रमाणपत्र प्रदान केले.
शिवप्रेरणा आणि उत्स्फूर्त लोकसहभाग
‘अमृत दुर्गोत्सव 2025’ हा उपक्रम शिवप्रेरणेने भारलेला होता. या उपक्रमात अबालवृद्धांचा मोठा सहभाग दिसून आला. महाराष्ट्राच्या कानाकोपऱ्यातून,शेजारील राज्ये, तसेच अमेरिका, इंग्लंड, आखाती देशांमधून नागरिकांनी या उपक्रमामध्ये मोठ्या उत्साहाने सहभाग नोंदविला. नागरिकांनी स्वतःच्या हातांनी तयार केलेल्या गड-दुर्गांच्या प्रतिकृतींचे फोटो डिजिटल अल्बममध्ये संग्रहित केले. असे अमृतच्या वरिष्ट अधिकाऱ्यांनी सांगितले.
पुढील उपक्रमांसाठी प्रेरणा
हा विश्वविक्रम केवळ महाराष्ट्रासाठीच नव्हे, तर जगभरातील शिवप्रेमींसाठी एक मोठी अभिमानाची बाब आहे. अमृत संस्थेने मानवी कल्पकता आणि डिजिटल तंत्रज्ञानाचा समन्वय साधून हा ऐतिहासिक टप्पा गाठला आहे. हा विक्रम शिवप्रेमींच्या एकजुटीचे प्रतीक आहे. या विक्रमामुळे भविष्यात शिवचरित्राशी संबंधित असे अनेक लोकसहभागाचे उपक्रम राबवण्यासाठी प्रेरणा मिळेल असे मत अमृतचे व्यवस्थापकीय संचालक विजय जोशी यांनी व्यक्त केले.
