Times of Maharashtra Desk, Pune: पुणे शहरामध्ये मागील काही दिवसांपासून गुन्हेगारीचे प्रमाण वाढले आहे. अनेक अल्पवयीन गुन्हेगारांकडे शस्त्र उपलब्ध झाल्याने शहरामध्ये कायदा सुव्यवस्थेचा प्रश्न निर्माण झाला आहे. या प्रकरणी पोलिसांनी अटक केलेल्या आरोपींची कसून चौकशी केली असता, त्यांना या शस्त्रांचा पुरवठा मध्य प्रदेशातून होत असल्याचे धागेदोरो पुणे पोलिसांच्या हाती लागले होते. या माहितीच्या आधारावर पुणे पोलिसांनी मध्य प्रदेशात धडक कारवाई करत अवैध शस्त्र बनवणाऱ्या एक टोळीला जेरबंद केले आहे.
पुणे शहर पोलिस उपायुक्त सोमय मुंडे यांच्या नेतृत्वाखाली झालेल्या या कारवाईत पोलिसांनी ४७ जणांना जेरबंद केले आहे. पुणे पोलिसांच्या एकूण १०५ अधिकारी व कर्मचाऱ्यांच्या पथकाने ही कारवाई केली. सुत्रांमार्फत मिळालेल्या माहितीची खातरजमा केल्यानंतर पोलिसांनी मध्य प्रदेशातील उर्मती परिसरामध्ये एकाच वेळी ही छापेमारी केली.
या छापेमारीत पिस्तूल तयार करण्यासाठी वापरल्या जाणाऱ्या चार स्वतंत्र फॅक्टऱ्या आढळून आल्या. या युनिट्समध्ये शस्त्रांची बेकायदेशीर निर्मिती, दुरुस्ती आणि पुरवठा सुरू असल्याची प्राथमिक माहिती समोर आली आहे. पोलिसांनी संपूर्ण यंत्रणा उध्वस्त करत कारखान्यांमध्ये आढळलेले सर्व साहित्य सील केले. कारवाईत १०० पेक्षा अधिक बॅरल, ५ मॅगझिन, १४ ग्राइंडिंग मशीन, २ पिस्तूल आणि ४ काडतुसे जप्त करण्यात आली. याशिवाय इतर महत्त्वाचे साचे, औजारे आणि उपकरणेही पोलिसांनी ताब्यात घेतली आहेत.
