Times of Maharashtra Desk, Pune: गेल्या काही दिवसांपासून पुणे शहरात किमान तापमानाने मोठी घट नोंदवली आहे. यामुळे पुणेकर चांगलेच गारठले असून, थंडीचा कडाका वाढला आहे. पुणे शहराच्या किमान तापमानाची नोंद ९.८ अंश सेल्सिअस इतकी झाली आहे. यापूर्वी शहराच्या तापमानामध्ये सातत्याने वाढ झाली होती, ज्यामुळे थंडी ओसरली होती. मात्र, आता पुन्हा एकदा पारा पाच अंश सेल्सिअसने खाली घसरल्याची नोंद झाली आहे.
दिवसा सूर्यप्रकाश असला तरी हवेत गारवा टिकून आहे, तर पहाटे आणि रात्री थंडीची तीव्रता अधिक जाणवत आहे. या तीव्र थंडीमुळे पुणेकरांनी ऊबदार कपडे आणि शेकोट्यांचा आधार घेण्यास सुरुवात केली आहे. हवामान खात्याने दिलेल्या अंदाजानुसार, पुढील काही दिवसांत किमान तापमानात थोडी वाढ होण्याची शक्यता वर्तवण्यात आली आहे. सध्या उत्तरेकडून येणाऱ्या थंड वाऱ्यांमुळे राज्यात बोचरी थंडी जाणवत आहे.
पुणेकरांनी थंडीच्या या वाढलेल्या कडाक्यापासून बचाव करण्यासाठी योग्य ती काळजी घेण्याचे आवाहन प्रशासनाकडून करण्यात येत आहे.
