Times of Maharashtra Desk, Pune: एकीकडे सुशिक्षित तरुण नोकरीसाठी वणवण भटकत असताना, पुणे महानगरपालिकेच्या माहिती व जनसंपर्क विभागात मात्र नियमांची अक्षरशः पायमल्ली होत असल्याचे धक्कादायक वास्तव समोर आले आहे. प्रभारी सहाय्यक माहिती व जनसंपर्क अधिकारी योगेश हेंद्रे यांच्या नियुक्तीवर आता गंभीर प्रश्नचिन्ह निर्माण झाले असून, हा केवळ प्रशासकीय गोंधळ नसून एक मोठा ‘फसवणुकीचा’ प्रकार असल्याचा आरोप होत आहे.
काय आहे नेमकं प्रकरण?
शासकीय राजपत्रातील नियमानुसार, माहिती व जनसंपर्क अधिकारी (श्रेणी-२) या पदासाठी उमेदवाराकडे पत्रकारिता व जनसंज्ञापन (Journalism & Mass Communication) मधील पदविका असणे आणि ०५ वर्षांचा कामाचा अनुभव असणे अनिवार्य आहे. मात्र, हेंद्रे यांच्याकडे या निकषांची पूर्तता होत आहे का? असा प्रश्न उपस्थित होत आहे.
१. अपात्रतेकडे दुर्लक्ष का? ज्या पदासाठी पदवी आणि विशिष्ट अनुभवाची गरज आहे, तिथे केवळ माहितगार सेवक म्हणून हेंद्रे यांची वर्णी का लावली गेली?
२. कोविडच्या नावाखाली नियमांना तिलांजली? जून २०२० मध्ये कोविडच्या आपत्कालीन परिस्थितीचा फायदा घेत घाईघाईने ही नियुक्ती करण्यात आली. मग ही नियुक्ती तात्पुरती होती की ‘कायमची’ सोय लावण्यासाठी?
३. पात्र उमेदवारांवर अन्याय का? महापालिकेच्या सेवेतील इतर ज्येष्ठ आणि पात्र कर्मचाऱ्यांना डावलून हेंद्रे यांनाच प्रभारी पदाचे कवच का दिले जात आहे?
पुणेकर आता जाब विचारणार!
करदात्या पुणेकरांच्या पैशावर डल्ला मारणारे हे ‘प्रभारी’ राज आता थांबले पाहिजे. जर हेंद्रे पात्र नसतील, तर त्यांच्याकडून आतापर्यंत घेतलेले वेतन वसूल का करू नये? अशा भ्रष्ट अधिकाऱ्यांना पाठीशी घालणारे वरिष्ठ अधिकारी कोण आहेत?
“महापालिकेत पारदर्शकता हवी असेल, तर या नियुक्तीची सीबीआय किंवा लाचलुचपत प्रतिबंधक विभागामार्फत चौकशी झालीच पाहिजे.” अशा संतप्त प्रतिक्रिया आता सर्वसामान्य नागरिकांमधून उमटत आहेत.
या प्रकरणात आता महापालिका आयुक्त काय कारवाई करणार? की हेंद्रे यांच्या या ‘फसवणुकीला’ मूक संमती देणार? याकडे सर्वांचे लक्ष लागले आहे.
