Times of Maharashtra Desk: खोपोली पोलीस ठाण्यात पाच ते सहा तासांपासून पोलिस आणि जमाव यांच्यात तणावपूर्ण परिस्थिती आहे. स्थानिक नागरिकांनी आरोपींवर त्वरित कारवाई करण्याची मागणी करत आंदोलन सुरु केले आहे. पोलिसांनी जमावाला पांगवण्याचा प्रयत्न केला, मात्र नागरिक हटण्याच्या मनस्थितीत नसल्याने बाचाबाची झाली.
प्रकरणाची पार्श्वभूमी
खोपोलीतील मंगेश काळोखे हत्याप्रकरणी राष्ट्रवादी काँग्रेसचे अजित पवार गटाचे जिल्हाध्यक्ष सुधाकर परशुराम घारे, जिल्हा प्रवक्ते भरत यांच्यासह एकूण दहा जणांवर गुन्हा दाखल करण्यात आला आहे. या गुन्ह्यात प्रत्यक्ष हत्या करणारे आणि कट रचणारे यांचा समावेश आहे.सुधाकर घारे हे सुनिल तटकरे यांचे समर्थक असून त्यांनी कर्जत विधानसभेत शिवसेना आमदार महेंद्र थोरवे यांच्या विरोधात अपक्ष निवडणूक लढवली होती, जिथे त्यांचा पाच हजार मतांनी पराभव झाला होता.
हत्या कशी घडली?
मंगेश काळोखे यांची हत्या आज सकाळी साडे सात वाजता झाली. त्यांच्या मुलाला शाळेतून सोडून घरी परतत असताना हल्लेखोरांनी त्यांच्यावर हल्ला केला. प्रत्यक्षदर्शींनी सांगितले की, हल्लेखोर काळ्या रंगाच्या वाहनातून आले होते. हल्ल्यानंतर आरोपी घटनास्थळावरून पळून गेले आहेत. खोपोली पोलिस हल्लेखोरांचा शोध घेत आहेत आणि मंगेश काळोखे यांच्या हत्येमागे कोणाचा हात आहे याबाबत अधिक तपास करत आहेत.
