Times Of Maharashtra Desk : उमरेड (जि. नागपूर) राज्यात इंधन तुटवड्याची शक्यता निर्माण होत असल्याने प्रशासनाने खबरदारीची पावले उचलण्यास सुरुवात केली आहे. उमरेडमध्ये पेट्रोल व डिझेलच्या पुरवठ्यात अडचणी येत असल्याच्या पार्श्वभूमीवर तहसीलदार तथा कार्यकारी दंडाधिकारी यांनी पेट्रोल पंप चालकांना कडक सूचना दिल्या आहेत.
आदेशानुसार, दुचाकी वाहनांना फक्त १ लिटर, चारचाकी वाहनांना १० लिटर आणि अवजड वाहनांना ३० लिटरपर्यंतच इंधन देण्याची मर्यादा घालण्यात आली आहे. यासोबतच नागरिकांनी इंधनासाठी अनावश्यक गर्दी टाळावी, असे आवाहनही करण्यात आले आहे.
पेट्रोल पंपांवर इंधन उपलब्धतेची माहिती दर्शवणे बंधनकारक करण्यात आले असून, इंधन साठा नियंत्रित ठेवण्यासाठी संबंधित विभागांना सतर्क राहण्याच्या सूचना देण्यात आल्या आहेत.
नियमांचे उल्लंघन केल्यास कडक कारवाईचा इशाराही प्रशासनाने दिला आहे.
वाढत्या निर्बंधांमुळे आणि इंधन मर्यादेमुळे राज्य लॉकडाऊनच्या दिशेने जात आहे का, असा प्रश्न नागरिकांमध्ये उपस्थित होत आहे. मात्र, प्रशासनाने सध्या कोणताही लॉकडाऊन जाहीर केलेला नाही, तर ही उपाययोजना फक्त तुटवडा टाळण्यासाठी असल्याचे स्पष्ट केले आहे.
