पालकांचे दुर्लक्ष की प्रोत्साहन? सुसाट वेगामुळे पादचाऱ्यांचा जीव धोक्यात
गेवराई (प्रतिनिधी विष्णू गायकवाड) : शहरासह तालुक्यात सध्या अत्यंत चिंताजनक परिस्थिती निर्माण झाली असून अल्पवयीन मुलांच्या हाती दुचाकी आणि चारचाकी वाहनांचे स्टिअरिंग दिसत आहे. ज्या वयात मुलांच्या हातात वह्या-पुस्तके असायला हवीत, त्या वयात ते रस्त्यांवर बेदरकारपणे वाहने चालवत असल्याचे चित्र पाहायला मिळत आहे. यामुळे संभाव्य अपघातांची भीती वाढली असून नागरिकांमध्ये संताप व्यक्त केला जात आहे.
शहरासह ग्रामीण भागातील प्रमुख रस्त्यांवर ही समस्या अधिक गंभीर झाली आहे. गेवराई–बीड मार्ग, गढी–माजलगाव रस्ता तसेच पाडळसिंगी–पाथर्डी मार्गावर अल्पवयीन मुले सुसाट वेगात आणि नियमांची पायमल्ली करत वाहने चालवताना दिसत आहेत. या बेफाम वाहनचालनामुळे पादचारी आणि इतर वाहनधारकांना जीव मुठीत धरून प्रवास करावा लागत आहे.
यामध्ये अधिक गंभीर बाब म्हणजे, काही पालक स्वतःच आपल्या मुलांना वाहने देत असल्याचे दिसून येत आहे. नियमांचे उल्लंघन होत असतानाही याकडे दुर्लक्ष केले जात असून, यामुळे अपघाताचा धोका अधिक वाढत आहे.
प्रशासनाकडून कारवाईची अपेक्षा
अल्पवयीनांकडून होणाऱ्या या बेदरकार वाहनचालनावर लगाम घालण्यासाठी उपप्रादेशिक परिवहन विभाग आणि पोलीस प्रशासनाने ठोस पावले उचलणे गरजेचे आहे. संबंधित मुलांवर तसेच त्यांच्या पालकांवर कठोर कायदेशीर कारवाई करण्याची मागणी नागरिकांकडून जोर धरत आहे.
वेळ अजूनही गेलेली नाही
सामाजिक कार्यकर्त्यांनी पालकांना आवाहन केले आहे की, मुलांच्या हट्टापायी त्यांना वाहन देणे टाळावे. अन्यथा एखाद्या मोठ्या अपघातातून जीवितहानी होण्याची शक्यता नाकारता येत नाही. योग्य वेळी जागरूकता आणि कठोर अंमलबजावणी केल्यासच ही समस्या आटोक्यात येऊ शकते.
एकूणच, गेवराई तालुक्यात वाढत चाललेले अल्पवयीनांचे बेदरकार वाहनचालन ही गंभीर समस्या बनली असून, यावर तातडीने उपाययोजना करण्याची गरज व्यक्त होत आहे.
