ब्रह्मपुरी (प्रतिनिधी रुपेश देशमुख) : महाराष्ट्र शासन महसूल व वन विभाग मार्फत राबविण्यात येत असलेल्या ‘छत्रपती शिवाजी महाराज महाराजस्व समाधान शिबीर अभियान (टप्पा-१)’ अंतर्गत शुक्रवार, दि. १० एप्रिल २०२६ रोजी मौजा पिंपळगाव येथे विशेष शिबिराचे आयोजन करण्यात आले आहे.
या शिबिराच्या माध्यमातून महसूल विभागाशी संबंधित नागरिकांच्या प्रलंबित कामांचा निपटारा एकाच ठिकाणी करण्यात येणार आहे. नागरिकांना शासकीय कार्यालयांत वारंवार चकरा माराव्या लागू नयेत आणि सेवा थेट त्यांच्या दारापर्यंत पोहोचाव्यात, या उद्देशाने हे अभियान राबविण्यात येत आहे.
पिंपळगाव महसूल मंडळ स्तरावर होणाऱ्या या शिबिरात ७/१२ व ८-अ उतारा दुरुस्ती, फेरफार नोंदी, जात प्रमाणपत्र, उत्पन्न दाखला, अधिवास प्रमाणपत्र (डोमिसाईल) तसेच नॉन-क्रीमी लेयर प्रमाणपत्र यांसारख्या विविध दाखल्यांचे वाटप व त्रुटींचे निराकरण केले जाणार आहे.
याशिवाय संजय गांधी निराधार योजना, श्रावणबाळ योजना तसेच रेशन कार्डाशी संबंधित अर्जांची दखलही घेतली जाणार आहे. नागरिकांनी आवश्यक कागदपत्रांसह (आधार कार्ड, रेशन कार्ड, जुने उतारे इ.) सकाळी १० वाजल्यापासून उपस्थित राहून या शिबिराचा लाभ घ्यावा, असे आवाहन करण्यात आले आहे.
या शिबिराला आमदार किर्तीकुमार उर्फ बंटी भांगडीया, अप्पर जिल्हाधिकारी संतोष थिटे, प्रांत अधिकारी पर्वणी पाटील आदी मान्यवर उपस्थित राहणार आहेत.
सदर शिबिरामध्ये सुमारे १५ विविध प्रकारचे दाखले वितरित करण्यात येणार असून, नागरिकांना शासकीय सेवांचा लाभ एकाच ठिकाणी मिळावा हा या उपक्रमामागील मुख्य उद्देश आहे. सर्व नागरिकांनी या समाधान शिबिराचा लाभ घ्यावा, असे आवाहन तहसीलदार सतीश मासाळ यांनी केले आहे.
