ब्रह्मपुरी (प्रतिनिधी रुपेश देशमुख) : प्रतिकूल परिस्थितीवर मात करत जिद्द आणि मेहनतीच्या जोरावर कुमारी कावेरी प्रमोद तूपट हिने यशाची नवी उंची गाठली आहे. चंद्रपूर जिल्हा पोलीस दलात तिची निवड झाल्याबद्दल ब्रह्मपुरी पोलीस स्टेशनतर्फे तिचा शाल व श्रीफळ देऊन सन्मान करण्यात आला.
ब्रह्मपुरीतील हनुमान नगर परिसरात राहणाऱ्या कावेरीच्या आयुष्यात अनेक अडचणी आल्या. वडिलांच्या निधनानंतर तिच्या आईने घरकाम करून कुटुंबाचा सांभाळ केला आणि मुलीच्या शिक्षणाची जबाबदारी उचलली. आईच्या अथक परिश्रमांमुळे आणि कावेरीच्या चिकाटीमुळे हे यश शक्य झाले आहे.
या प्रसंगी पोलीस निरीक्षक प्रमोद बानबले, सहाय्यक पोलीस निरीक्षक मनोज खडसे, उपनिरीक्षक बालाजी चव्हाण व हवालदार अरुण पिसे यांच्या हस्ते कावेरीचा सत्कार करण्यात आला. उपस्थित अधिकारी, कर्मचारी तसेच गावातील पोलीस पाटील यांनी तिचे अभिनंदन करत पुढील वाटचालीस शुभेच्छा दिल्या.
यावेळी बोलताना पोलीस निरीक्षक बानबले यांनी सांगितले की, अशा सत्कार सोहळ्यांमुळे पोलीस भरतीची तयारी करणाऱ्या तरुणांना प्रेरणा मिळते. समाजातील तरुणांनी देशसेवेच्या भावनेने पुढे यावे, असे त्यांनी आवाहन केले.
कावेरीनेही आपल्या भावना व्यक्त करत सांगितले की, “आईच्या कष्टाचे आज फळ मिळाले. खाकी वर्दी घालून देशसेवा करण्याचे माझे स्वप्न पूर्ण झाले आहे.”
कावेरीचे हे यश ग्रामीण भागातील तरुण-तरुणींसाठी प्रेरणादायी ठरत असून, तिच्यावर सर्व स्तरातून कौतुकाचा वर्षाव होत आहे.
