सिन्नर (प्रतिनिधि नवनाथ आव्हाड) : दोन बहिणींची मुंबई पोलीस दलात निवड; वृक्षमित्र फाउंडेशनकडून सत्कार
सिन्नर तालुक्यातील पिंपळे येथील निकिता सुभाष पानसरे (शेळके) व पुनम सुभाष पानसरे या दोन बहिणींची मुंबई पोलीस दलात निवड झाल्याने परिसरात आनंदाचे वातावरण निर्माण झाले आहे. प्रतिकूल परिस्थितीवर मात करत मेहनत, जिद्द आणि चिकाटीच्या जोरावर दोघींनी हे यश मिळविले.
दोन्ही मुलींच्या निवडीमुळे आई सुमन पानसरे व वडील सुभाष पानसरे यांचा आनंद गगनात मावेनासा झाला आहे. “मुलींचे यश हेच आमच्या आयुष्याचे खरे सार्थक आहे,” अशी भावना शेतकरी वडिलांनी व्यक्त केली. निकिता हिने विवाहानंतर व एका मुलीची जबाबदारी सांभाळत अभ्यास करून यश संपादन केले. तिच्या निवडीमुळे सासू ताराबाई शेळके यांनीही आनंद व्यक्त केला.
निकिता व पुनम यांनी सिन्नर येथील इन्फिनिटी करिअर अकॅडमीमध्ये प्रशिक्षण घेतले. अकॅडमीचे संचालक ऋषिकेश उगले यांच्या मार्गदर्शनाचा मोठा लाभ झाल्याचे त्यांनी सांगितले.
यशाबद्दल वृक्षमित्र फाउंडेशनतर्फे दोघींचा सत्कार करण्यात आला. यावेळी संस्थापक अध्यक्ष विष्णू वाघ, ऋषिकेश उगले, कांचन वाघ, सानिका वाघ तसेच प्रशिक्षणार्थी विद्यार्थी उपस्थित होते
टाइम्स ऑफ महाराष्ट्र साठी सिन्नरहुन नवनाथ आव्हाड
