पालघर (प्रतिनिधी निलेश गावंडे): महाराष्ट्र नवनिर्माण सेनेत पक्षशिस्तीचा भंग करणाऱ्यांविरोधात कठोर भूमिका घेतली जात असल्याचे समोर आले आहे. मनसे अध्यक्ष राजसाहेब ठाकरे यांच्या आदेशानुसार श्री. समीर मोरे यांना देण्यात आलेल्या पालघर व डहाणू विधानसभा मतदारसंघाच्या जिल्हाध्यक्षपदाला स्थगिती देण्यात आली आहे. पक्षशिस्तीचे पालन न केल्यामुळे ही कारवाई करण्यात येत असल्याचे आदेशात नमूद करण्यात आले आहे.
या निर्णयामुळे पालघर जिल्ह्यातील मनसेच्या राजकीय वर्तुळात चर्चेला उधाण आले आहे. गेल्या काही काळापासून पालघर मनसेतील अंतर्गत घडामोडी आणि वाद चर्चेत होते. समीर मोरे यांच्याशी संबंधित राजकीय घडामोडींमुळे जिल्ह्यातील मनसेच्या राजकारणाला वेगळे वळण मिळाल्याची चर्चा होती.
यापूर्वी समीर मोरे यांनी शेकडो कार्यकर्त्यांसह शिवसेनेत प्रवेश केल्याचे वृत्तही समोर आले होते. या पार्श्वभूमीवर आता मनसे नेतृत्वाने जिल्हाध्यक्षपद स्थगित करण्याचा निर्णय घेतल्याने राजकीय चर्चांना आणखी वेग आला आहे.
पक्षशिस्तीचे पालन न करणाऱ्या पदाधिकाऱ्यांविरोधात कोणतीही तडजोड केली जाणार नाही, असा संदेश या कारवाईतून पक्ष नेतृत्वाने दिल्याची चर्चा राजकीय वर्तुळात आहे. तसेच, पक्षाच्या सर्व पदाधिकाऱ्यांनी संबंधित आदेशाची नोंद घ्यावी, असेही स्पष्ट करण्यात आले आहे.
दरम्यान, पालघर मनसेतील अंतर्गत घडामोडींनंतर पक्ष नेतृत्वाने घेतलेल्या या निर्णयाचा आगामी काळात जिल्ह्यातील मनसेच्या संघटनात्मक आणि राजकीय वाटचालीवर काय परिणाम होतो, याकडे सर्वांचे लक्ष लागले आहे.
