ब्रम्हपुरी :(प्रतिनिधी रुपेश देशमुख) राष्ट्रध्वज हा प्रत्येक भारतीयाच्या अभिमानाचे आणि राष्ट्रीय एकात्मतेचे प्रतीक आहे. राष्ट्रीय सण तसेच विविध राष्ट्रीय कार्यक्रमांच्या निमित्ताने नागरिकांना राष्ट्रध्वजाची आवश्यकता भासते. मात्र, नागरिकांना राष्ट्रध्वज सहज उपलब्ध व्हावा यासाठी स्थानिक पातळीवर योग्य व्यवस्था असणे गरजेचे आहे. याच पार्श्वभूमीवर ब्रम्हपुरी नगर परिषद कार्यालयात नागरिकांसाठी राष्ट्रध्वज उपलब्ध करून देण्याची कायमस्वरूपी व्यवस्था करावी, अशी मागणी नगरसेवक मनोज भूपाल यांनी नगर परिषद प्रशासनाकडे केली आहे.
राष्ट्रध्वज उपलब्ध करून देताना राष्ट्रध्वज संहिता आणि शासनाच्या संबंधित नियमांचे काटेकोर पालन करण्यात यावे, अशी मागणी भूपाल यांनी केली आहे. नागरिकांना राष्ट्रध्वज खरेदी किंवा मिळवण्यासाठी इतरत्र भटकंती करावी लागू नये, यासाठी नगर परिषद कार्यालयातच आवश्यक सुविधा उपलब्ध करून देण्याची मागणी करण्यात आली आहे.
यासोबतच राष्ट्रध्वजाचा सन्मान, योग्य वापर आणि त्यासंदर्भातील नियमांबाबत नागरिकांमध्ये जनजागृती करण्यात यावी, असेही भूपाल यांनी म्हटले आहे. राष्ट्रध्वजाची विक्री किंवा वितरण करताना शासनाच्या नियमांचे पालन होणे आवश्यक असल्याचे त्यांनी स्पष्ट केले.
दरम्यान, राष्ट्रध्वज नागरिकांना मोफत उपलब्ध करून देण्याबाबत नगर परिषद प्रशासनाची भूमिका काय असेल, याकडे नागरिकांचे लक्ष लागले आहे.
याबाबत नगर परिषद ब्रम्हपुरीच्या मुख्य अधिकारी डॉ. माधुरी सलामे यांनी सांगितले की, “नागरिकांना राष्ट्रध्वज मोफत द्यायचा की नाही, हा निर्णय पूर्णपणे ब्रम्हपुरी नगर परिषद प्रशासनाचा आहे. या मागणीचा योग्य विचार करून शासकीय नियमांनुसार यावर अंतिम निर्णय घेतला जाईल.”
नगरसेवक मनोज भूपाल यांच्या मागणीमुळे नागरिकांना राष्ट्रध्वज सहज उपलब्ध होण्यासोबतच त्याच्या सन्मानपूर्वक वापराबाबत जनजागृतीला चालना मिळण्याची अपेक्षा व्यक्त होत आहे.
