विनोद पवार ( जळगांव प्रतिनिधी) : सेवाग्राम आश्रम या ऐतिहासिक व पवित्र स्थळी जळगाव येथील सामाजिक कार्यकर्ते व पत्रकार डॉ. विनोद सुधाकर पवार यांना नेपाळस्थित गांधी पीस फाऊंडेशन तर्फे ‘अहिंसा सन्मान 2026’ प्रदान करून गौरविण्यात आले. महात्मा गांधी यांच्या कार्यभूमीवर २२ मार्च २०२६ रोजी आयोजित कार्यक्रमात हा सन्मान सोहळा उत्साहात पार पडला.
या कार्यक्रमास नेपाळहून आलेले गांधी देशपांडे (राष्ट्रीय संपर्क प्रमुख) यांची प्रमुख उपस्थिती लाभली. तसेच गांधी पीस फाऊंडेशनचे जनरल सेक्रेटरी ॲड. डॉ. दिल बहादुर राणा, डॉ. सुनील सिंग परदेशी (संस्थापक अध्यक्ष – कर्तव्यदक्ष पोलीस मित्र फाउंडेशन, नाशिक), डॉ. मनोहर चव्हाण (माजी सैनिक), डॉ. रेणुका दास जोशी आणि डॉ. दिनेश देशमुख यांच्या हस्ते डॉ. पवार यांना सन्मानचिन्ह व प्रमाणपत्र देण्यात आले.
या सोहळ्यात महाराष्ट्रातील तब्बल २१ नामवंत सामाजिक कार्यकर्त्यांना समाजसेवा, शिक्षण, अंधश्रद्धा निर्मूलन, योग आणि विविध सामाजिक क्षेत्रांतील उल्लेखनीय योगदानाबद्दल मानद डॉक्टरेट पदवी देऊन सन्मानित करण्यात आले. याशिवाय राज्यातील तीन व्यक्तींना “ग्लोबल पीस अवॉर्ड” देऊन गौरविण्यात आले.
कार्यक्रमाला महाराष्ट्रातील विविध जिल्ह्यांमधून अनेक संघटनांचे पदाधिकारी, कार्यकर्ते आणि सामाजिक क्षेत्रातील मान्यवर मोठ्या संख्येने उपस्थित होते. संपूर्ण वातावरण गांधीवादी विचारांनी प्रेरित आणि सेवाभावी कार्याच्या गौरवाने भारलेले होते.
आपल्या भावना व्यक्त करताना डॉ. पवार म्हणाले
“हा पुरस्कार मी माझ्या मातृचरणी अर्पण करतो. माझ्या कुटुंबियांसह समाजातील विविध घटक आणि ज्यांनी समाजसेवा व पत्रकारितेच्या कार्यासाठी मला प्रोत्साहन दिले त्या सर्वांना हा सन्मान समर्पित आहे.”
डॉ. विनोद सुधाकर पवार यांच्या या उल्लेखनीय कामगिरीबद्दल विविध क्षेत्रातील मान्यवरांकडून त्यांचे अभिनंदन करण्यात येत असून त्यांच्या पुढील वाटचालीस शुभेच्छांचा वर्षाव होत आहे.
