अकोला (प्रतिनिधी ज्ञानेश्वर जाधव) : अकोला जिल्ह्यातील पातूर तालुक्यातील तुलंगा बुद्रुक येथे घडलेल्या दुर्दैवी घटनेत नदीमध्ये बुडून दिलीप मुंडे यांचा मृत्यू झाला. या घटनेमुळे संपूर्ण गावावर शोककळा पसरली असून गावकऱ्यांमध्ये हळहळ व्यक्त केली जात आहे. दिलीप मुंडे यांच्या निधनाची माहिती मिळताच महाराष्ट्र राज्याचे उपमुख्यमंत्री Eknath Shinde यांनी संवेदनशीलता दाखवत त्यांच्या कुटुंबीयांना तत्काळ एक लाख रुपयांची आर्थिक मदत जाहीर केली.
स्थानिक पदाधिकारी प्रणव तायडे यांनी या दुर्दैवी घटनेची माहिती दूरध्वनीद्वारे मुख्यमंत्री कार्यालयापर्यंत पोहोचवली होती. त्यानंतर उपमुख्यमंत्री एकनाथ शिंदे यांनी तातडीने मदतीचे निर्देश दिले. या मदतीमुळे दुःखात असलेल्या मुंडे कुटुंबियांना काही प्रमाणात दिलासा मिळाला असल्याची भावना गावकऱ्यांनी व्यक्त केली.
या प्रसंगी अकोला जिल्ह्याचे संपर्कप्रमुख राजेंद्र साळवी, माजी आमदार नारायणजी गव्हाणकर, पांडे गुरुजी, प्रणव तायडे तसेच गावातील अनेक नागरिक मोठ्या संख्येने उपस्थित होते. गावकऱ्यांनी उपमुख्यमंत्री एकनाथ शिंदे यांनी दाखवलेल्या तत्परतेचे आणि संवेदनशीलतेचे कौतुक केले.
दरम्यान, दिलीप मुंडे यांच्या आकस्मिक निधनामुळे त्यांच्या कुटुंबावर दुःखाचा डोंगर कोसळला आहे. गावातील नागरिक आणि नातेवाईकांकडून कुटुंबियांना धीर देण्याचा प्रयत्न सुरू असून प्रशासनाकडूनही आवश्यक ती मदत व सहकार्य केले जात असल्याची माहिती यावेळी देण्यात आली.
