पुण्यात आयोजित करण्यात आलेल्या बजाज पुणे ग्रँड चॅलेंज टूर-2026 या आंतरराष्ट्रीय सायकलिंग स्पर्धेमुळे पिंपरी-चिंचवड महानगरपालिकेच्या हद्दीतील शाळांच्या वेळापत्रकात बदल करण्यात आला आहे. या स्पर्धेत 40 देशांतील 171 नामांकित आंतरराष्ट्रीय सायकलपटू सहभागी झाले असून स्पर्धेचा चौथा टप्पा पिंपरी-चिंचवड परिसरातून जाणार आहे.
या पार्श्वभूमीवर, स्पर्धा मार्गावर येणाऱ्या सर्व सरकारी व खासगी शाळा 23 जानेवारी रोजी दुपारी 12 वाजेपर्यंतच सुरु ठेवण्याचे आदेश देण्यात आले आहेत. दुपारी 12 नंतर शाळा बंद ठेवण्याचे आदेश जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष जितेंद्र डूडी यांनी जारी केले आहेत.
स्पर्धेच्या चौथ्या टप्प्याला बालेवाडी येथील छत्रपती शिवाजी स्टेडियम येथून सुरुवात होणार आहे. ही स्पर्धा पुणे शहर हद्दीतून मार्गक्रमण करत राजीव गांधी ब्रिजमार्गे पिंपरी-चिंचवड महानगरपालिका हद्दीत प्रवेश करणार आहे. पुढे ही शर्यत सांगवी, वाकड, निगडी, त्रिवेणीनगर, भोसरी, चिखली, पिंपरी व काळेवाडी परिसरातून फिरून पुन्हा राजीव गांधी ब्रिजमार्गे पुणे शहर हद्दीत प्रवेश करणार आहे.
स्पर्धा सुरळीत व सुरक्षितपणे पार पाडण्यासाठी तसेच नागरिकांची गैरसोय टाळण्यासाठी स्पर्धा मार्गावर सर्व प्रकारच्या वाहनांना प्रवेशबंदी करण्यात आली असून वाहतूक पर्यायी मार्गांवर वळविण्यात आली आहे. नागरिकांनी प्रशासनाच्या सूचनांचे पालन करण्याचे आवाहन करण्यात आले आहे.
