काँग्रेस पक्षाच्या राष्ट्रीय अध्यक्ष पदी मल्लिकार्जुन खर्गे यांची निवड तर शशी थरूर यांचा पराभव…
पुणे :- काँग्रेस अध्यक्षपदासाठी झालेल्या निवडणुकीत शशी थरूर यांचा पराभव झाला आहे. या निवडणुकीत मल्लिकार्जुन खर्गे हे विजयी झाले असून ते काँग्रेसचे नवे अध्यक्ष बनले आहेत. ही निवडणूक 24 वर्षानंतर पार पडली आहे. 17 ऑक्टोबरला झालेल्या काँग्रेस अध्यक्षपदासाठीच्या निवडणुकीमध्ये 9385 जणांनी मतदान केले होते.
यातील 416 मते बाद झाली होती. खर्गे यांना 7897 मते मिळाली तर थरूर यांना 1072 मते मिळाली.
काँग्रेस अध्यक्ष पदासाठी झालेल्या निवडणुकीची मतमोजणी बुधवारी म्हणजेच 19 ऑक्टोबरला पार पडली. सकाळी 10 वाजल्यापासून मतमोजणीला सुरुवात झाली होती. मतमोजणीचा निकाल दुपारी 4 पर्यंत जाहीर करण्यात येईल असं सांगितलं जात होतं मात्र हा निकाल दुपारी दीडच्या सुमारासच स्पष्ट झाला. मतमोजणीला सुरुवात झाल्यानंतर शशी थरुर यांच्या गटाचे सलमान सोज यांनी निवडणुकीत गडबड झाल्याचा आरोप केला. सोज यांनी केंद्रीय निवडणूक प्राधिकरणाचे अध्यक्ष मधुसूदन मिस्त्री यांना पत्र लिहून निवडणुकीत गडबड झाल्याचा आरोप केला आहे. उत्तर प्रदेशात झालेल्या मतदानात गडबड झाल्याचा सोज यांनी आरोप केला होता आणि उत्तर प्रदेशातील सर्व मते अवैध ठरवण्यात यावी अशी मागणी त्यांनी केली होती.
