Times of Maharashtra Desk मुंबई :आगामी बृहन्मुंबई महानगरपालिका निवडणुकीच्या पार्श्वभूमीवर महायुतीतील घटक पक्षांमध्ये जागावाटपावरून गेल्या काही दिवसांपासून सुरू असलेल्या चर्चांना आता निर्णायक वळण मिळाले आहे. भाजप आणि मुख्यमंत्री एकनाथ शिंदे यांच्या शिवसेनेमध्ये मुंबईतील जागावाटपाचा नवा फॉर्म्युला जवळपास निश्चित झाल्याची माहिती मिळाली आहे.
मिळालेल्या माहितीनुसार, मुंबई महापालिकेच्या एकूण 227 प्रभागांपैकी भाजप 140 तर शिंदे गटाची शिवसेना 87 जागांवर निवडणूक लढवणार आहे. महायुतीतील अजित पवार गटाची राष्ट्रवादी काँग्रेस ही मुंबईत स्वतंत्रपणे निवडणूक लढवणार असल्याचे स्पष्ट झाले आहे. त्यामुळे भाजप आणि शिंदे शिवसेना मिळून सर्व 227 जागा लढवणार आहेत.
यापूर्वी झालेल्या पहिल्या बैठकीत भाजपकडून शिंदे गटासाठी फक्त 52 जागा सोडण्याची तयारी दर्शवण्यात आली होती. मात्र, ठाकरे बंधूंच्या (उद्धव ठाकरे–राज ठाकरे) संभाव्य युतीनंतर भाजपने आपली भूमिका बदलत शिवसेनेला अधिक जागा देण्याची तयारी दर्शवली. तरीही या जागावाटपाच्या सूत्रावर अधिकृतरित्या शिक्कामोर्तब कधी होणार, याकडे राजकीय वर्तुळाचे लक्ष लागले आहे.
बंडखोरी टाळण्यासाठी भाजपचे ‘वेट अॅण्ड वॉच’ धोरण
मुंबई महापालिका निवडणुकीसाठी भाजपकडून अद्याप एकाही उमेदवाराची अधिकृत घोषणा करण्यात आलेली नाही. अंतर्गत बंडखोरी टाळण्यासाठी भाजपकडून ‘वेट अॅण्ड वॉच’ धोरण अवलंबले जात असल्याची चर्चा आहे. ठाणे, मुंबई, नवी मुंबई, कल्याण-डोंबिवली, मिरा-भाईंदर आणि पनवेल या महापालिकांमधील जागावाटपाचा पेच अद्याप कायम असून, उद्यापर्यंत हा प्रश्न मार्गी लागेल, अशी माहिती समोर आली आहे.
मुंबई महापालिका निवडणूक कार्यक्रम जाहीर
आशियातील सर्वात श्रीमंत महानगरपालिका म्हणून ओळखल्या जाणाऱ्या बृहन्मुंबई महानगरपालिकेची निवडणूक जाहीर झाली आहे. मुंबईसह राज्यातील महापालिकांसाठी 15 जानेवारी 2026 रोजी मतदान होणार असून 16 जानेवारी 2026 रोजी मतमोजणीहोईल. मुंबई महापालिकेच्या 227 प्रभागांसाठी ही निवडणूक होणार आहे.
मुंबई महापालिकेचा कार्यकाळ 7 मार्च 2022 रोजी संपुष्टात आला असून तेव्हापासून प्रशासक राजवट सुरू आहे. मागील महापालिका निवडणूक 2017 मध्ये झाली होती. त्या वेळी शिवसेनेच्या किशोरी पेडणेकर या महापौर म्हणून कार्यरत होत्या.
मुंबई महापालिका निवडणूक 2026 : महत्त्वाच्या तारखा
- नामनिर्देशन दाखल: 23 ते 30 डिसेंबर
- छाननी: 31 डिसेंबर
- नामनिर्देशन मागे घेणे: 2 जानेवारी 2026 पर्यंत
- अंतिम उमेदवार यादी व चिन्ह वाटप: 3 जानेवारी 2026
- मतदान: 15 जानेवारी 2026
- मतमोजणी/निकाल: 16 जानेवारी 2026
आगामी निवडणुकीत ठाकरे गट, मनसे आणि महायुती यांच्यातील राजकीय समीकरणे कशी बदलतात, याकडे संपूर्ण राज्याचे लक्ष लागले आहे. तर भाजप आणि शिंदे गट महानगरपालिकेसाठी कोणती रणनीती वापरणार ही पाहण्याजोग असणार आहे.
