गेवराई (प्रतिनिधी विष्णू गायकवाड) : आर्थिक फायद्याच्या उद्देशाने स्वतःच्या शेतात गांजाचे पिक घेणाऱ्या एका इसमावर गेवराई पोलिसांनी मोठी कारवाई करत 5.800 किलो गांजाची झाडे जप्त केली आहेत. या मुद्देमालाची किंमत अंदाजे 1 लाख 74 हजार रुपये आहे.
ही कारवाई 24 मार्च 2025 रोजी गेवराई तालुक्यातील सुशी (वडगाव) येथे करण्यात आली. पोलीस अधीक्षक नवनीत काँवत यांच्या आदेशानुसार अंमली पदार्थांविरोधात सुरू असलेल्या मोहिमेअंतर्गत ही धडक कारवाई करण्यात आली.
गुप्त माहितीच्या आधारे, भाऊसाहेब तात्याबा तुरुकमारे (वय 60, रा. सुशी वडगाव, ता. गेवराई, जि. बीड) यांनी त्यांच्या गट नंबर 234 मधील शेतात ज्वारीच्या पिकामध्ये गांजाची लागवड केल्याचे उघड झाले. त्यानुसार पोलीस पथकाने कृषी व महसूल विभागाच्या कर्मचाऱ्यांसह शेतात धाड टाकली.
पाहणीदरम्यान शेतात ज्वारीच्या पिकामध्ये लपवून ठेवलेली गांजाची एकूण 42 झाडे आढळून आली. पोलिसांनी तत्काळ ही झाडे जप्त करून आरोपीला अटक केली.
या प्रकरणी आरोपीविरुद्ध एनडीपीएस कायद्यान्वये गुन्हा दाखल करण्यात आला असून पुढील तपास सुरू आहे.
ही कारवाई पोलीस अधीक्षक नवनीत काँवत, अपर पोलीस अधीक्षक सचिन पांडकर, उपविभागीय पोलीस अधिकारी अनिल कटके यांच्या मार्गदर्शनाखाली पोलीस निरीक्षक किशोर पवार व त्यांच्या पथकाने केली.
