विष्णू गायकवाड ( गेवराई प्रतिनिधी ) : गेवराई तालुक्यातील चकलांबा पोलिस ठाण्याच्या ठाणेदार पदासाठी सुरू असलेल्या हालचालींमध्ये एक धक्कादायक प्रकार समोर आला आहे. बीड ग्रामीण पोलिस ठाण्यात कार्यरत असलेले सहायक पोलिस निरीक्षक (API) बाळराजे दराडे यांनी कर्तव्यावर असतानाच कोणतीही पूर्वपरवानगी न घेता थेट मुंबई गाठल्याने पोलिस विभागात खळबळ उडाली आहे. या प्रकरणाची गंभीर दखल घेत पोलिस अधीक्षक नवनीत काँवत यांनी चौकशीचे आदेश दिले आहेत.
काय आहे नेमका प्रकार?
१० मार्च रोजी चकलांबा पोलिस ठाण्याचे API संदीप पाटील हे ५० हजारांची लाच घेताना एसीबीच्या सापळ्यात अडकले. त्याच दिवशी बाळराजे दराडे यांची रात्री गस्त (नाईट पेट्रोलिंग) ड्यूटी होती. मात्र, ते कोणालाही न सांगता अचानक मुंबईला रवाना झाले.
दरम्यान, बीडच्या उपविभागीय पोलिस अधिकारी पूजा पवार यांनी बीड ग्रामीण पोलिस ठाण्यात अचानक भेट दिली असता दराडे अनुपस्थित असल्याचे आढळले. चौकशीदरम्यान त्यांनी मुख्यालय सोडण्यापूर्वी कोणतीही अधिकृत परवानगी घेतली नसल्याचे स्पष्ट झाले.
नियमांचे उल्लंघन
पोलिस खात्यातील नियमांनुसार, कोणत्याही अधिकाऱ्याने मुख्यालय सोडण्यापूर्वी संबंधित वरिष्ठ अधिकाऱ्यांची परवानगी घेणे बंधनकारक असते. मात्र, दराडे यांनी ही प्रक्रिया पूर्णपणे दुर्लक्षित केली.
चौकशी सुरू
या प्रकरणाची चौकशी सध्या उपविभागीय पोलिस अधिकारी पूजा पवार यांच्या नेतृत्वाखाली सुरू असून, येत्या दोन ते तीन दिवसांत अहवाल पोलिस अधीक्षकांकडे सादर केला जाणार आहे. अहवालानुसार पुढील कारवाई ठरवण्यात येणार आहे.
अधिकाऱ्यांची प्रतिक्रिया
नवनीत काँवत (पोलिस अधीक्षक, बीड) यांनी स्पष्ट शब्दांत सांगितले की,
“परवानगीशिवाय मुख्यालय सोडणे हे पोलिस खात्यात मान्य नाही. बेशिस्तपणा सहन केला जाणार नाही. योग्य अधिकाऱ्यांचीच निवड केली जाईल.”
सोमनाथ जाधव (पोलिस निरीक्षक, बीड ग्रामीण) यांनी सांगितले की,
१० मार्च रोजी उपअधीक्षकांच्या भेटीदरम्यान API उपस्थित नव्हते. ते कुठे गेले होते, हे स्पष्ट सांगता येत नाही.”
तर बाळराजे दराडे यांनी आपली बाजू मांडताना सांगितले की,
मी पहाटेपर्यंत ड्यूटी केली आणि नंतर मुंबईला गेलो. परवानगी न घेणे ही चूक झाली, त्याबद्दल मी माफी मागितली आहे.
बीड ग्रामीण पुन्हा वादात
विशेष म्हणजे, याआधीही बीड ग्रामीण पोलिस ठाणे वादाच्या भोवऱ्यात सापडले होते. तत्कालीन पोलिस निरीक्षक अशोक मुदिराज यांचा ‘हप्ता’ मागतानाचा व्हिडिओ व्हायरल झाल्यानंतर त्यांची बदली करण्यात आली होती.
