लोणार, प्रतिनिधी : जागतिक पर्यावरण दिन तसेच ‘मी लोणारकर टीम’च्या वर्धापन दिनानिमित्त ५ जून रोजी लोणार शहरात भव्य स्वच्छता व वृक्षारोपण मोहीम उत्साहात पार पडली. ‘क्लीन लोणार, ग्रीन लोणार’ आणि ‘एक घर एक झाड’ या संकल्पनेतून आयोजित करण्यात आलेल्या या उपक्रमाला नागरिकांचा उत्स्फूर्त प्रतिसाद लाभला.
मोहिमेचा शुभारंभ छत्रपती शिवाजी महाराज उद्यान, मंठा नाका येथे बुलढाणा जिल्हाधिकारी डॉ. प्रवीण देवरे यांच्या हस्ते वृक्षारोपण करून करण्यात आला. त्यानंतर छत्रपती शिवाजी महाराज उद्यान ते धारातीर्थ परिसरात स्वच्छता मोहीम राबविण्यात आली तसेच मोठ्या प्रमाणात वृक्षलागवड करण्यात आली. “आपल्या शहराला आपली गरज आहे” या संदेशातून शहर स्वच्छ व हरित ठेवण्याचा निर्धार यावेळी व्यक्त करण्यात आला.
यानंतर पर्यटक सुविधा केंद्र येथे समारोपीय कार्यक्रम झाला. ‘मी लोणारकर टीम’चे संतोष जाधव यांनी प्रास्ताविक केले, तर प्रा. गजानन खरात यांनी सूत्रसंचालन केले. मानद वन्यजीव रक्षक सचिन कापुरे यांनी उपस्थितांना ‘माझी वसुंधरा’ अभियानाची शपथ दिली. जिल्हाधिकारी डॉ. देवरे यांच्या मार्गदर्शनानंतर प्रमाणपत्र वितरणाने कार्यक्रमाची सांगता झाली.
या उपक्रमाचे आयोजन मी लोणारकर टीम, शिवछत्र मित्र मंडळ, निसर्ग मल्टीपर्पज संस्था, लोणार पत्रकार संघ, विदर्भ अकॅडमी, विविध शासकीय कार्यालये आणि लोणारकर नागरिकांच्या संयुक्त विद्यमाने करण्यात आले.
