दौंड प्रतिनिधी -मयूर साळवे, संघराज गायकवाड
ता. 18 जुलै 2025: दौंड तालुक्यातील कुंभारगल्ली येथे एका अल्पवयीन मुलीवर लग्नाचे आमिष दाखवून वारंवार शारीरिक शोषण केल्याप्रकरणी जय कमल मोटवाणी (वय 25, रा. जनता कॉलनी, बंगला साईड, दौंड) याला दौंड पोलिसांनी अटक केली आहे. या प्रकरणी दौंड पोलीस ठाण्यात गुन्हा क्रमांक 468/2025 अंतर्गत भारतीय न्याय संहिता (BNS) कलम 64, 64(2)(M), 69, 351(2) आणि बालकांचे लैंगिक अपराधापासून संरक्षण अधिनियम (POCSO) कलम 4 आणि 6 अन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, मागील ऑगस्ट 2024 पासून ते 15 दिवसांपूर्वीपर्यंतच्या कालावधीत, आरोपी जय मोटवाणी याने फिर्यादी अल्पवयीन मुलीला लग्नाचे आमिष दाखवून तिच्या इच्छेविरुद्ध अतुल जाधव यांच्या भाड्याच्या खोलीत शारीरिक संबंध प्रस्थापित केले. पीडित मुलीने दिलेल्या तक्रारीवरून पोलिसांनी तात्काळ कारवाई करत आरोपीला अटक केली.
या प्रकरणाचा तपास पोलीस उपनिरीक्षक (पो.स.ई.) रुपेश कदम यांच्याकडे सोपवण्यात आला असून, त्यांनीच तक्रार दाखल करून घेतली आहे. पोलीस पुढील तपास करत असून, आरोपीविरुद्ध कठोर कारवाई करण्यात येणार असल्याचे सांगण्यात आले.
