दौंड (प्रतिनिधी राहुल आढाव,मयुर साळवे) : बुधवार दि. २४ डिसेंबर २०२५ रोजी संस्कार प्रायमरी व हायस्कूल येथे नाताळ सणानिमित्त विविध सांस्कृतिक कार्यक्रमांचे आयोजन करण्यात आले होते. या कार्यक्रमाची सुरुवात विद्यार्थ्यांच्या सुंदर नृत्य सादरीकरणाने झाली. इयत्ता ३री व ४थीच्या विद्यार्थिनींनी एक नृत्य तर इयत्ता ५वी, ६वी व ७वीच्या विद्यार्थिनींनी सादर केलेल्या दोन नृत्यांनी उपस्थितांची मने जिंकली. यासोबतच काही विद्यार्थ्यांनी प्रभू येशूंचे गुणगान करणारी भावस्पर्शी गीते सादर केली.
दरवर्षीप्रमाणे याही वर्षी नाताळ सणाचे औचित्य साधून संस्कार स्कूलमधील गरजू व होतकरू विद्यार्थ्यांना सायकलींचे वाटप करण्यात आले. शाळेच्या दहा वर्षांच्या परंपरेनुसार मान्यवरांच्या हस्ते हे सायकल वितरण करण्यात आले. यावेळी इयत्ता ६वीतील कु. शौर्य पवार व इयत्ता ५वीतील कु. आरोही जाधव या दोन विद्यार्थ्यांना सायकल प्रदान करण्यात आली.
या कार्यक्रमासाठी प्रमुख पाहुणे म्हणून सचिन खवाड (चेअरमन, नॉर्थन मेमोरियल ख्रिस्त चर्च), बाळासाहेब क्षेत्रे (पास्टर),आशिष क्षेत्रे, विजय बोरकर (नगरसेवक), विशाल माशाळकर, वैशाली माशाळकर (नगरसेविका), दीपक शासम (अध्यक्ष, शासम फाउंडेशन) यांची उपस्थिती लाभली. तसेच गणेश भोसले,शिरीष पुरंदरे आदी मान्यवर उपस्थित होते.
विद्यार्थ्यांमध्ये सामायिकरण व काळजी घेण्याची भावना निर्माण व्हावी, या उद्देशाने शाळेत पाॅटलुक पार्टीचे आयोजन करण्यात आले होते. यामध्ये विद्यार्थ्यांनी भारतीय संस्कृतीचा वारसा जपत विविध राज्यांतील प्रसिद्ध खाद्यपदार्थ आणले होते. सर्व विद्यार्थ्यांनी एकत्र येऊन या विविध पदार्थांचा आनंद घेतला. यावेळी शाळेतर्फे विद्यार्थ्यांना खाऊचे वाटपही करण्यात आले.
कार्यक्रमाचे सूत्रसंचालन इयत्ता ९वीतील कु. शर्वरी पवार व कु. अपूर्वा शिंदे यांनी केले. प्रमुख पाहुण्यांनी आपल्या मनोगतातून शाळेच्या उपक्रमांचे कौतुक केले. कार्यक्रमाच्या शेवटी इयत्ता ९वीतील विद्यार्थी कु. अरफात शेख याने आभार प्रदर्शन केले. कार्यक्रमाची सांगता प्रार्थनेने करण्यात आली.
