देऊळगाव (प्रतिनिधी बबनराव नागरे) : देऊळगाव राजा येथे बकरी ईद (ईद-उल-अजहा) मोठ्या उत्साहात, शांततेत आणि धार्मिक वातावरणात साजरी करण्यात आली. दिनांक २८ मे २०२६ रोजी सकाळी ईदगाह मैदानावर मुस्लिम बांधव मोठ्या संख्येने एकत्र जमले आणि ईदची विशेष नमाज अदा करण्यात आली. नमाजनंतर सर्वांनी एकमेकांना आलिंगन देत ईदच्या शुभेच्छा दिल्या व बंधुभावाचा संदेश दिला.
यावेळी पोलीस प्रशासनानेही शांतता व सुव्यवस्था राखण्यासाठी चोख बंदोबस्त ठेवला होता. पोलिस उपनिरीक्षक ब्रह्मागिरी साहेब यांनी उपस्थित मुस्लिम बांधवांना ईदच्या शुभेच्छा देत सामाजिक ऐक्य आणि शांततेचे महत्त्व अधोरेखित केले. कार्यक्रमादरम्यान नासिर भाई जनता सेवा, काजी इस्माईल साहेब, काजी नबिल साहेब तसेच काजी सूफी गुलाम अहमद साहेब यांनी उपस्थितांना संबोधित करत ईद-उल-अजहाचा संदेश स्पष्ट केला. त्यांनी समाजात प्रेम, बंधुता, एकोपा आणि शांतता टिकवून ठेवण्याचे आवाहन केले.
सणानिमित्त शहरात उत्साहाचे वातावरण निर्माण झाले होते. विविध धर्मीय नागरिकांनीही मुस्लिम बांधवांना शुभेच्छा देत सामाजिक सलोखा जपण्याचा संदेश दिला. देऊळगाव राजा शहरात बकरी ईदचा सण आनंद, एकता आणि परस्पर सौहार्दाचे प्रतीक ठरला.
