देऊळगाव राजा (प्रतिनिधी बबनराव नागरे) : शहरातील वार्ड क्रमांक ५ व २ मधील नागरिकांच्या विविध समस्यांच्या निवारणासाठी भगवान बाबा नगर मंदिर येथे विशेष सभा आयोजित करण्यात आली. या सभेच्या अध्यक्षस्थानी भाजपा नेते डॉ. गणेश मांटे होते.
सभेला नगरपरिषद उपाध्यक्षपती राजेश भुतडा, बांधकाम सभापती विष्णू झोरे, बालकल्याण सभापती पती विकास कासारे, गटनेते छोटूभाऊ वाघ यांच्यासह भगवान बाबा नगर, समता कॉलनी व स्वामी विवेकानंद नगर परिसरातील नागरिक व महिलांची मोठ्या संख्येने उपस्थिती होती.
या सभेत पिण्याच्या पाण्याचा नियमित पुरवठा, नवीन नळकनेक्शन, विद्युत पोल उभारणी, नाल्यांचे बांधकाम, सांडपाणी व्यवस्थापन तसेच रस्त्यांच्या दर्जेदार कामांबाबत नागरिकांनी विविध समस्या मांडल्या. विशेषतः पाणीपुरवठा किमान आठ दिवसांत नियमित करण्याची मागणी नागरिकांनी केली.
यावर संबंधित पदाधिकाऱ्यांनी तातडीने उपाययोजना करण्याचे आश्वासन देत, भगवान बाबा नगर परिसराचे सुशोभीकरण तसेच नालंदा वाचनालय परिसराच्या विकासालाही प्राधान्य दिले जाईल, असे स्पष्ट केले.
नगरपालिकेच्या इतिहासात प्रथमच नगरसेवक थेट नागरिकांच्या दारी जाऊन समस्या जाणून घेत असल्याने नागरिकांनी समाधान व्यक्त करत पदाधिकाऱ्यांचे कौतुक केले. सर्व समस्या प्राधान्यक्रमाने सोडविण्याचा प्रयत्न केला जाईल, अशी ग्वाही यावेळी देण्यात आली.
कार्यक्रमाचे प्रास्ताविक बबनराव नागरे यांनी केले, तर आभार प्रदर्शन धुमाळ सर यांनी मानले.
