विष्णू गायकवाड ( गेवराई प्रतिनिधी ) : तालुक्यातील धुमेगाव येथे शताब्दी महोत्सवानिमित्त अखंड हरिनाम सप्ताह व ग्रंथराज ज्ञानेश्वरी पारायण सोहळ्याचे भक्तीमय वातावरणात आयोजन करण्यात आले आहे. हा धार्मिक सोहळा २६ मार्च ते २ एप्रिल दरम्यान पार पडणार असून ग्रामस्थ, तरुण मंडळे व महिला मंडळ यांच्या सहकार्याने मोठ्या उत्साहात साजरा केला जात आहे.
या सप्ताहादरम्यान दररोज पहाटे काकडा आरती, हरिनामाचा गजर आणि ग्रंथराज ज्ञानेश्वरीचे पारायण होणार आहे. तसेच सायंकाळी हरिपाठ, कीर्तन व प्रवचन कार्यक्रमाचे आयोजन करण्यात आले आहे. विशेष म्हणजे रामायणाचार्य संजय महाराज पाचपोर यांच्या वाणीतून रामकथेचे निरूपण हे या सप्ताहाचे प्रमुख आकर्षण ठरणार आहे.
कार्यक्रमात विविध कीर्तनकारांचा सहभाग असून २६ मार्च रोजी चैतन्य महाराज देगलुरकर, २७ रोजी विशाल महाराज खोले, २८ रोजी शिवाजी महाराज नारायणगड, २९ रोजी उमेश महाराज दशरथे, ३० रोजी प्रकाश महाराज जवंजाळ तसेच ज्ञानसिंधु संदिपान महाराज हसेगावकर, ३१ रोजी पांडूरंग महाराज घुले यांची कीर्तने होणार आहेत.
सप्ताहाचा समारोप २ एप्रिल रोजी सकाळी ११ ते १ या वेळेत महंत स्वामी जनार्दन गुरु स्वामी निगमानंद महाराज, क्षेत्र मच्छिंद्रगड संस्थान यांच्या काल्याच्या कीर्तनाने होणार असून त्यानंतर महाप्रसादाचे आयोजन करण्यात आले आहे.
या भक्तीमय सोहळ्यास परिसरातील भाविकांनी मोठ्या संख्येने उपस्थित राहून लाभ घ्यावा, असे आवाहन ग्रामस्थांनी केले आहे.
