Times of Maharashtra Desk, Pune : इंदापूर नगरपरिषदेच्या नगराध्यक्षपदाच्या निवडणुकीवरून राष्ट्रवादी काँग्रेस पक्षात मोठा अंतर्गत संघर्ष उफाळून आला आहे. पुणे जिल्हा राष्ट्रवादी काँग्रेसचे अध्यक्ष प्रदीप गारटकर यांनी थेट पक्षाचे अध्यक्ष तथा राज्याचे उपमुख्यमंत्री अजित पवार आणि इंदापूरचे आमदार व कृषीमंत्री दत्तात्रय भरणे यांना गर्भित इशारा दिल्यामुळे पुण्याच्या राजकारणात मोठी खळबळ उडाली आहे.
वाद नगराध्यक्षपदाच्या उमेदवारीवरून
इंदापूर नगरपरिषदेच्या आगामी नगराध्यक्षपदाच्या निवडणुकीत उमेदवारी कोणाला द्यायची, यावरून हा पेच निर्माण झाला आहे. माजी उपनगराध्यक्ष भरत शहा यांना राष्ट्रवादी काँग्रेसमध्ये प्रवेश देऊन घड्याळ चिन्हावर उमेदवारी देण्याच्या प्रयत्नांना जिल्हाध्यक्ष प्रदीप गारटकर आणि त्यांच्या समर्थकांनी कडाडून विरोध दर्शवला आहे. या उमेदवारीवरून इंदापूरमधील राष्ट्रवादी काँग्रेसमध्ये आता दोन गट पडले आहेत.
गारटकरांचा थेट इशारा
बुधवारी पुण्यात अजित पवार आणि दत्तात्रय भरणे यांच्या उपस्थितीत या वादावर चर्चा झाली. मात्र सायंकाळी इंदापूरमध्ये आपल्या कार्यकर्त्यांसोबत झालेल्या बैठकीत गारटकर यांनी आपली रोखठोक भूमिका ठामपणे मांडली. पक्षाने आमच्या समर्थकांच्या भावना मान्य केल्या नाहीत आणि सन्मान दिला नाही तर आपण कठोर निर्णय घेण्यास मागेपुढे पाहणार नाही असा इशारा त्यांनी दिला. पक्ष नेतृत्वाने आमचे म्हणणे ऐकले आणि योग्य सन्मान ठेवला तर आम्ही घड्याळ चिन्हावरच राहू. पण जर पक्षाने आम्हाला कोललं तर आम्हीसुद्धा पक्षाला कोलल्याशिवाय राहणार नाही. अन्याय सहन न करता मी नैतिकतेच्या आधारावर जिल्हाध्यक्ष पदाचा राजीनामा देईन आणि स्वतंत्र आघाडी उभी करून निवडणुकीच्या आखाड्यात उतरू असे त्यांनी सांगितले.
गारटकर यांनी उमेदवारी अर्ज भरण्याच्या अखेरच्या दिवसापर्यंत पक्षाच्या निर्णयाची वाट पाहणार असल्याचे स्पष्ट केले आहे. गारटकर गटाच्या या थेट पवित्र्यामुळे इंदापूरचे राजकारण तापले असून, हा वाद उपमुख्यमंत्री अजित पवार आणि मंत्री दत्तात्रय भरणे यांच्यासाठी मोठी डोकेदुखी ठरण्याची शक्यता आहे.
