Times of Maharashtra desk, Pune: नागपूरहून पुण्याकडे निघालेल्या इंडिगो एअरलाइनच्या प्रवाशांना गुरुवारी रात्री मोठा मनस्ताप सहन करावा लागला. नियोजित वेळेनुसार रात्री ११ वाजून ४० मिनिटांनी नागपूरहून पुण्याकडे उड्डाण केलेले विमान पुण्याला न येता थेट हैदराबाद येथे उतरले. या धक्कादायक प्रकारामुळे प्रवाशांमध्ये संतापाचे वातावरण निर्माण झाले होते.
मिळालेल्या माहितीनुसार, इंडिगोच्या विमानाने नागपूरहून उड्डाण घेतल्यानंतर पुणे विमानतळावर लँडिंगसाठी जागा उपलब्ध नसल्याचे कारण देत विमान हैदराबाद विमानतळावर उतरवण्याचा निर्णय घेण्यात आला.
रात्री उशिरा हे विमान हैदराबादला पोहोचले आणि प्रवाशांना तिथेच मध्यरात्री सोडण्यात आले. महत्त्वाच्या कामासाठी पुण्याकडे निघालेल्या प्रवाशांना यामुळे प्रचंड गैरसोयीचा सामना करावा लागला. हैदराबादला उतरवल्यानंतरही सुमारे तासभर प्रवाशांना विमानातच बसवून ठेवण्यात आले होते. काही प्रवाशांनी आक्रमक भूमिका घेतल्यानंतर सर्वांना विमानतळावर उतरवण्यात आले.
गेल्या काही दिवसांपासून इंडिगोच्या सेवेत सतत होणारा गोंधळ आणि विमानांचे विलंब तसेच रद्द होण्याचे प्रकार वाढत असल्यामुळे प्रवाशांकडून संताप व्यक्त होत आहे. या प्रकरणाची गंभीर दखल घेत डीजीसीएने इंडिगो कंपनीकडून सविस्तर स्पष्टीकरण मागितले आहे. कंपनीने अलीकडे उद्भवलेल्या अनपेक्षित आव्हानांमुळे कामात व्यत्यय आल्याचे सांगत प्रवाशांची माफी मागितली आहे.
