विनोद पवार (जळगाव प्रतिनिधी) : जळगाव येथे सकाळ समूह मार्फत आयोजित करण्यात आलेल्या “गौरवगाथा” या विशेष सन्मान सोहळ्यात विविध क्षेत्रात उल्लेखनीय कार्य करणाऱ्या मान्यवरांचा गौरव करण्यात आला. या कार्यक्रमाच्या अध्यक्षस्थानी रक्षा खडसे (केंद्रीय राज्यमंत्री) उपस्थित होत्या.
या गौरव सोहळ्यात जळगाव, धुळे आणि नंदुरबार या तीन जिल्ह्यांतील सामाजिक, वैद्यकीय, शैक्षणिक, औद्योगिक तसेच इतर विविध क्षेत्रात उल्लेखनीय कार्य करणाऱ्या मान्यवरांचा सत्कार करण्यात आला. समाजासाठी उल्लेखनीय योगदान देणाऱ्या व्यक्तींच्या कार्याचा गौरव करणे ही समाजासाठी प्रेरणादायी बाब असल्याचे यावेळी सांगण्यात आले.
यावेळी वरणगाव येथील गणपती हॉस्पिटलचे डॉ. पी. व्ही. पाटील यांना मूळव्याध (पाइल्स) या आजारावर आधुनिक पद्धतीने यशस्वी उपचार करून रुग्णसेवा केल्याबद्दल विशेष सन्मान देण्यात आला. त्यांच्या कार्याची दखल घेत उपस्थित मान्यवरांनी त्यांचे अभिनंदन केले.
अध्यक्षीय भाषणात केंद्रीय राज्यमंत्री रक्षा खडसे यांनी सांगितले की, समाजासाठी मोलाचे योगदान देणाऱ्या व्यक्तींचा सन्मान हा केवळ गौरव नसून तो इतरांसाठी प्रेरणा देणारा क्षण असतो. अशा सकारात्मक आणि प्रेरणादायी उपक्रमांचे आयोजन केल्याबद्दल त्यांनी सकाळ समूहाचे मनःपूर्वक अभिनंदन केले.
कार्यक्रमास अरुण गुजराती (माजी अध्यक्ष, महाराष्ट्र विधानसभा) तसेच महेश्वर रेड्डी (पोलीस अधीक्षक, जळगाव) हे प्रमुख पाहुणे म्हणून उपस्थित होते. कार्यक्रमाला विविध क्षेत्रातील मान्यवर, पत्रकार, सामाजिक कार्यकर्ते आणि नागरिक मोठ्या संख्येने उपस्थित होते.
कार्यक्रमाचे आयोजन अत्यंत उत्साहपूर्ण वातावरणात पार पडले असून उपस्थितांनी या उपक्रमाचे कौतुक केले.
