दिनेश चाफळकर (रायगड प्रतिनिधी) : महाड येथील उपविभागीय दंडाधिकारी तथा प्रांत कार्यालयाला लागून असलेल्या विद्युत ट्रान्सफॉर्मरचा अज्ञात कारणास्तव स्फोट होऊन आग लागल्याची घटना घडली. स्फोटानंतर परिसरात मोठा आवाज झाल्याने काही काळ भीतीचे वातावरण निर्माण झाले होते. घटनेची माहिती मिळताच महानगर परिषदेच्या अग्निशमन दलाने तात्काळ घटनास्थळी धाव घेतली आणि वेगाने कारवाई करत आग आटोक्यात आणली. त्यामुळे सुदैवाने कोणतीही जीवितहानी झाली नाही.
ट्रान्सफॉर्मरला लागलेल्या आगीमुळे शेजारील फुल विक्रेत्याचे दुकान, एक हॉटेल तसेच अन्य एका दुकानाचे नुकसान झाल्याची प्राथमिक माहिती समोर आली आहे. आगीच्या ज्वाळा वाढण्याची शक्यता लक्षात घेऊन अग्निशमन दलाच्या जवानांनी तत्परतेने पाण्याचा मारा सुरू केला आणि मोठा अनर्थ टाळला.
दरम्यान, घटनेचे ठिकाण एसटी आगार आणि मुख्य रस्त्यालगत असल्याने काही काळ वाहतुकीची कोंडी निर्माण झाली होती. पोलिसांनी तातडीने घटनास्थळी पोहोचून वाहतूक सुरळीत केली. प्रशासनाकडून या घटनेची पुढील चौकशी सुरू असून स्फोटाचे नेमके कारण शोधण्याचे काम सुरू असल्याची माहिती देण्यात आली आहे.
