जळगाव ( प्रतिनिधी विनोद पवार ) : समाजाच्या घडामोडी जनतेपर्यंत पोहोचवणारे पत्रकार आता मैदानावरही आपली ताकद दाखवणार आहेत. जळगावमध्ये ‘पत्रकार प्रीमियर लीग – पर्व २’ या अनोख्या क्रिकेट स्पर्धेला आजपासून उत्साहात सुरुवात होत आहे. दि. २६ ते २९ मार्च दरम्यान सागर पार्क मैदानावर रंगणाऱ्या या स्पर्धेची जिल्हाभरात जोरदार चर्चा सुरू आहे.
दररोज बातम्यांच्या धावपळीत व्यस्त असणाऱ्या पत्रकारांना विरंगुळा मिळावा, तसेच त्यांच्यात मैत्री, समन्वय आणि खेळाडूवृत्ती वाढावी या उद्देशाने या स्पर्धेचे आयोजन करण्यात आले आहे. विशेष म्हणजे या स्पर्धेत तब्बल २६ संघ सहभागी होत असून, जिल्ह्यातील विविध क्षेत्रातील मान्यवरही मैदानात उतरून खेळाचा आनंद लुटणार आहेत.
जळगाव जिल्ह्यातील १४ संघ, शहरातील ५ संघ, संपादकांचा विशेष संघ तसेच लोकप्रतिनिधी, प्रशासकीय अधिकारी, डॉक्टर, वकील आणि पोलीस प्रशासनाचे संघ या स्पर्धेत रंगत आणणार आहेत. त्यामुळे ही स्पर्धा केवळ क्रिकेटपुरती मर्यादित न राहता एक सामाजिक एकात्मतेचा उत्सव ठरणार आहे.
स्पर्धेचा शुभारंभ आज सकाळी ७ वाजता होत असून, उद्घाटनासाठी अनेक मान्यवरांची उपस्थिती अपेक्षित आहे. चार दिवस चालणाऱ्या या क्रिकेट महोत्सवात खेळाडूंकरिता मोफत चहा व जेवणाची सुविधा उपलब्ध करून देण्यात आली आहे. तसेच प्रेक्षकांसाठीही कोणतेही प्रवेश शुल्क ठेवण्यात आलेले नाही.
समारोप सोहळ्यात विजेत्या संघांना आकर्षक बक्षिसे देण्यात येणार असून, उत्कृष्ट खेळाडूंनाही सन्मानित केले जाणार आहे. त्यामुळे जळगावकरांसाठी ही स्पर्धा क्रीडा आणि मनोरंजनाचा दुहेरी आनंद देणारी ठरणार आहे.
या अनोख्या क्रिकेट स्पर्धेला मोठ्या संख्येने उपस्थित राहून उत्साह वाढवावा, असे आवाहन आयोजकांनी नागरिकांना केले आहे.
