Times of Maharashtra Desk, Pune: जगभरात खळबळ उडवणाऱ्या अमेरिकन उद्योगपती जेफ्री एपस्टीन प्रकरणाशी संबंधित नव्या चर्चेमुळे भारतातही राजकीय वातावरण तापण्याची शक्यता वर्तवली जात आहे. महाराष्ट्राचे माजी मुख्यमंत्री आणि पंतप्रधान कार्यालयाचे माजी मंत्री पृथ्वीराज चव्हाण यांनी दिलेल्या काही मुलाखतींमुळे हे प्रकरण पुन्हा चर्चेत आले आहे.
जेफ्री एपस्टीन कोण होता?
जेफ्री एपस्टीन हा अमेरिकेतील फायनान्स क्षेत्रातील प्रभावशाली व्यक्ती होता. त्याने आपल्या कारकिर्दीची सुरुवात बेअर स्टर्न्स या नामांकित कंपनीत केली होती. नंतर त्याने स्वतःची गुंतवणूक फर्म स्थापन करून अब्जावधी डॉलर्सची संपत्ती मिळवली. मात्र पुढे त्याच्यावर अल्पवयीन मुलींच्या लैंगिक शोषणाचा आणि सेक्स ट्रॅफिकिंग नेटवर्क चालवण्याचा गंभीर आरोप झाला. त्याचे खासगी विमान लोलिता एक्सप्रेस आणि लिटल सेंट जेम्स हे खासगी बेट या गैरप्रकारांचे केंद्र असल्याचे तपासात समोर आले.
प्रकरण उघडकीस कसे आले?
2005 साली फ्लोरिडामध्ये एका 14 वर्षीय मुलीने तक्रार केल्यानंतर हे प्रकरण उघडकीस आले. तपासात मसाजच्या नावाखाली अल्पवयीन मुलींवर लैंगिक अत्याचार होत असल्याचे स्पष्ट झाले. 2008 मध्ये एपस्टाईनला अटक झाली, मात्र त्याला अत्यंत सौम्य शिक्षा मिळाल्याने अमेरिकेत तीव्र टीका झाली. हा करार स्वीटहार्ट डील म्हणून ओळखला जातो. त्याची सहकारी घिसलेन मॅक्सवेल हिने पीडित मुलींचे भरती व ग्रुमिंग केल्याचा आरोप आहे. 2021 मध्ये तिला 20 वर्षांची शिक्षा सुनावण्यात आली.
एपस्टीनचा संशयास्पद मृत्यू
2019 मध्ये पुन्हा अटक झाल्यानंतर न्यूयॉर्कमधील तुरुंगात असताना एपस्टीनचा मृत्यू झाला. अधिकृतरीत्या आत्महत्या सांगितली गेली असली तरी त्या दिवशी कॅमेरे बंद असणे, सुरक्षारक्षक झोपलेले असणे आणि शवविच्छेदन अहवालातील विसंगती यामुळे अनेक शंका उपस्थित झाल्या. Epstein Didn’t Kill Himself हा इंग्लिश वाक्प्रचार त्यानंतर जगभर व्हायरल झाला होता.
आंतरराष्ट्रीय नेते आणि सेलिब्रिटींची नावे
तपासात उघड झालेल्या फ्लाइट लॉग्स, ईमेल्स आणि कागदपत्रांमध्ये माजी अमेरिकी अध्यक्ष बिल क्लिंटन, ब्रिटनचे प्रिन्स अँड्र्यू, उद्योगपती बिल गेट्स, डोनाल्ड ट्रम्प यांचे माजी सल्लागार स्टीव्ह बॅनन यांसारखी नावे समोर आली. मात्र यापैकी अनेकांनी आरोप फेटाळले आहेत.
भारताशी संबंधित संदर्भ
या प्रकरणात भारताशी संबंधित काही नावेही चर्चेत आली आहेत. अनिल अंबानी यांच्या ईमेल खात्यातून 2017 मध्ये जेफ्री एपस्टीनला पाठवलेला एक ईमेल समोर आला. हा ईमेल भारत–इस्रायल संरक्षण सहकार्याच्या पार्श्वभूमीवर असल्याचा दावा केला जातो. सध्याचे केंद्रीय मंत्री हरदीप सिंग पुरी यांच्या नावाने एपस्टाईनच्या खासगी कॅलेंडरमध्ये काही भेटींची नोंद असल्याचा उल्लेख कागदपत्रांत आहे. मात्र भाजपकडून हे आरोप फेटाळण्यात आले असून, हे व्यावसायिक किंवा संयुक्त राष्ट्रांशी संबंधित कार्यक्रम असल्याचे स्पष्टीकरण देण्यात आले आहे. 2019 मध्ये एपस्टीनने स्टीव्ह बॅननमार्फत पंतप्रधान नरेंद्र मोदी यांच्याशी भेट घडवून आणण्याचा प्रयत्न केल्याचा दावा काही ईमेल्समध्ये आढळतो. याबाबतही कोणताही थेट पुरावा समोर आलेला नाही.
पृथ्वीराज चव्हाण यांचा दावा
पृथ्वीराज चव्हाण यांचे म्हणणे आहे की, अमेरिकेत जर एपस्टीन प्रकरणातील सर्व कागदपत्रे आणि फोटो सार्वजनिक झाले, तर त्याचे आंतरराष्ट्रीय राजकारणावर परिणाम होऊ शकतात. त्यांच्या मते, या प्रकरणात काही भारतीय नेत्यांची नावे पुढे आल्यास देशातील राजकीय परिस्थिती बदलू शकते, असा अंदाज त्यांनी व्यक्त केला आहे.
सध्या हे सर्व दावे, कागदपत्रे आणि अंदाज चर्चेच्या पातळीवर आहेत. भारत सरकार किंवा संबंधित व्यक्तींविरोधात कोणताही ठोस आरोप किंवा न्यायालयीन निर्णय झालेला नाही. मात्र जागतिक पातळीवर सुरू असलेल्या तपासामुळे आणि कागदपत्रांच्या उघडकीमुळे या प्रकरणाकडे देश-विदेशात बारकाईने लक्ष ठेवले जात आहे.
