उरुळी कांचन : एका व्यावसायिकाला व्यवसायात भागीदारी
करून नफा कमवून देण्याचे आमिष दाखवून दोघांनी १३ लाख रुपये घेऊन फसवणूक केल्याची घटना कदमवाकवस्ती परिसरात घडली. या प्रकरणी मोईन मुन्नई खान (सध्या रा. समतानगर, कदमवाकवस्ती ता. हवेली, मूळ रा. घर नंबर ७९६/७ पुराणा रसुलपुर, फिरोजाबाद, उत्तरप्रदेश) व अब्दुल कलीम खान फैजुल्लाखान (सध्या रा. लोणी स्टेशन, कदमवाकवस्ती ता. हवेली, मूळ रा. जलाली मोहल्ला, मडगाव, जि. जळगाव) या दोघांवर गुन्हा दाखल करण्यात आला आहे.
याबाबत श्रीपाद जयवंत बळप (वय ३९, रा. ओंकार निवास, शिक्षक कॉलनी, लोणी स्टेशन, कदमवाकवस्ती, ता. हवेली) यांनी फिर्याद दिली आहे.
लोणी काळभोर पोलिसांनी दिलेल्या माहितीनुसार, आरोपी मोईन खान व अब्दुल कलीम खान हे फिर्यादी श्रीपाद बळप यांच्या परिचयाचे आहेत. आरोपी हे पोलपाट, चाळण, पिंजरे विक्रीचा होलसेल व्यवसाय करतात. तसेच बांगड्या सुद्धा बनवितात. त्यांनी बळप यांना या हस्तकला व्यवसायात खूप फायदा असल्याने तुम्ही यामध्ये गुंतवणूक केली तर तुम्हाला या व्यवसायामध्ये भागीदारी देऊ, असे आमिष दाखविले. बळप यांनी यावर विश्वास ठेवून त्यांना चेक व आरटीजीएसद्वारे २० लाख ६३ हजार रुपये दिले. आणि बळप यांनी गुंतवणूक करण्यास सांगितले.
Advertisement By Unique Computers
👇👇Click the Image below👇👇
काही कालावधीनंतर श्रीपाद बळप यांनी आरोपींकडे गुंतवलेल्या रकमेची मागणी केली परंतु, आरोपींनी टाळाटाळ करत उडवाउडवीची उत्तरे दिली. आपली फसवणूक झाल्याचे लक्षात येताच बळप यांनी लोणी काळभोर पोलिस ठाण्यात दोघांविरोधात फसवणुकीची तक्रार दिली आहे. पुढील तपास पोलिस उपनिरीक्षक दिगंबर सोनटक्के करीत आहेत.
