Times of Maharashtra Desk: राज्यातील नगरपालिका निवडणुकांसाठी उद्या 2 डिसेंबर मतदान होणार आहे. त्यामुळे आज रात्री 10 वाजेपर्यंतच प्रचार करता येणार आहे. यंदा उमेदवारांना एक दिवस जास्त प्रचारासाठी मिळाल्याने वातावरण अजून तापलं आहे.
राजकीय पक्षांचे मोठे नेते अजूनही सभा घेत आहेत. उपमुख्यमंत्री अजित पवार यांनी पुण्यातील राजगुरुनगर येथे जनसभेला संबोधित केले. ते म्हणाले, “आज निवडणुकिच्या आधीचा दिवस आहे. उद्या निवडणुका आहेत. आजच्या रात्री मतदार जागे असतात,” अशी त्यांनी मिश्कील टिप्पणी केली. तर याआधी काही दिवसांपूर्वी मंत्री गुलाबराव पाटील यांनीही “लक्ष्मीदर्शन होणार आहे, बाहेर झोपा,” अशी विनोदी टीका केली होती.
राज्यातील अनेक नगरपालिकांमध्ये प्रभागनिहाय निवडणुका पुढे ढकलल्या आहेत. पण उर्वरीत नगरपालिकांसाठी उद्या (2 डिसेंबर) मतदान होणार आहे.या पार्श्वभूमीवर आजच्या सभेत अजित पवार यांनी मतदारांच्या मानसिकतेबद्दल बोलत उमेदवारांना सल्ला दिला. ते म्हणाले, “उमेदवारांनो, आजची रात्र डोळ्यात तेल घालून जागा राहा. मतदार मतदानाच्या आदल्या दिवशी खूप विचार करतात. घराबाहेर आवाज आला तरी ते म्हणतात—‘होय, मी जागा आहे… कोणाला मतदान करायचं ते ठरवत आहे.’
या पुढे ते म्हणाले मी कामाचा माणूस आहे, माझी प्रशासनावर पकड आहे. मात्र, काही लोकं माझ्यावर आरोप करतात. मी असा आहे, तसा आहे, 70 हजार कोटींचा भ्रष्टाचार केला. पण मी एक रुपयांचा मिंदा नाही. तुम्ही दाखवून द्या, की मी कामं करताना कोणाकडून पैसे घेतले किंवा चिरीमिरी द्यावी लागली. याउलट प्रशासन मला टरकून राहतं,
अजित पवारांचं जनतेला आश्वासन
भाषण करताना अजित पवार यांनी येत्या हिवाळी अधिवेशनात तुमचा प्रश्न मार्गी लावतो. आता आचारसंहिता असल्यानं मला स्पष्टपणे बोलता येणार नाही. मात्र, या अधिवेशनात तुमचा प्रश्न सोडवण्यासाठी किती निधी लागेल, त्यासाठी काय करावं लागेल हे पाहतो. पण, आचारसंहितेमध्ये मला यावर बोलता येणार नाही. तुम्ही माझं ऐकलं तर मी तुमचं ऐकेन. परत म्हणाल मी दम दिला म्हणून. त्यामुळे, तुम्ही माझी विनंती ऐकली तर मी तुमची विनंती ऐकेन, असा मिश्कील आणि मस्तीखोर अंदाजात जनतेला आश्वासन ही दिले
