विनोद पवार ( जळगाव प्रतिनिधी ) : शहरातील कृपा चौक परिसरात रविवारी (दि. १५ फेब्रुवारी) सकाळी घडलेल्या भीषण दुर्घटनेने संपूर्ण परिसर हादरला. सकाळी सुमारे १० वाजण्याच्या सुमारास एका राहत्या घरात घरगुती गॅस सिलेंडरचा अचानक स्फोट झाला. या स्फोटानंतर लागलेल्या भीषण आगीत तब्बल तीन घरे पूर्णपणे जळून खाक झाली.
स्फोट इतका तीव्र होता की, आगीच्या ज्वाळांनी शेजारील घरांनाही वेढले. लाकडी पार्टिशन व अरुंद रस्त्यांमुळे आग वेगाने पसरली. घरातील संसारोपयोगी साहित्य, कपाटात ठेवलेली रोकड, सोन्याचे दागिने व महत्त्वाची कागदपत्रे आगीत भस्मसात झाली. काही क्षणांतच कुटुंबीयांचा संपूर्ण संसार राखरांगोळी झाला.
घटनेची माहिती मिळताच जळगाव महानगरपालिकेच्या अग्निशमन दलाच्या पाच बंबांनी तातडीने घटनास्थळी धाव घेतली. जवानांनी शर्थीचे प्रयत्न करून आग आटोक्यात आणली. सुदैवाने या घटनेत कोणतीही जीवितहानी झाली नसली तरी मोठे आर्थिक नुकसान झाले आहे.
प्राथमिक अंदाजानुसार, सुरुवातीला शॉर्ट सर्किट होऊन त्यानंतर गॅस सिलेंडरचा स्फोट झाल्याची शक्यता व्यक्त केली जात आहे. स्थानिक नगरसेवकांनी घटनास्थळी भेट देऊन पीडित कुटुंबांना धीर दिला असून तातडीच्या शासकीय मदतीची मागणी करण्यात येत आहे.
या घटनेमुळे परिसरात भीतीचे वातावरण निर्माण झाले असून नागरिकांनी घरगुती गॅस व विद्युत उपकरणांबाबत सतर्क राहण्याचे आवाहन प्रशासनाने केले आहे.
