मुंबईत मराठी–अमराठी वाद पुन्हा एकदा ऐरणीवर आला असून, चेंबूरमधील एका घटनेमुळे वातावरण तापण्याची शक्यता निर्माण झाली आहे. मुंबईतील प्रसिद्ध बांधकाम व्यावसायिक सुशील रहेजा याच्याविरोधात एका मराठी तरुणाला जातीवाचक शिवीगाळ व मारहाण केल्याचा गंभीर आरोप करण्यात आला आहे.
मिळालेल्या माहितीनुसार, तक्रारदार तरुण हा चेंबूर येथील डॉ. सी. जी. गिडवाणी रोडवरील रहेजा होम्स कार्यालयात शिपाई म्हणून कार्यरत होता. घटनेच्या दिवशी कार्यालयात बैठक सुरू असताना तक्रारदाराला काही कागदपत्रे जोडून स्टॅपल करण्याचे काम देण्यात आले होते. मात्र, स्टॅपल नीट न लागल्याच्या कारणावरून सुशील रहेजाने तक्रारदारावर राग व्यक्त करत शिवीगाळ केल्याचा आरोप आहे.
तक्रारदाराच्या म्हणण्यानुसार, यावेळी सुशील रहेजाने “तुम घाटी लोग कभी सुधरोगे नहीं” असे म्हणत त्याला मारहाण केली. तसेच तक्रारदार हा एका विशिष्ट समाजाचा असल्याने त्याला कार्यालयात अपमानास्पद वागणूक देण्यात आली आणि नोकरीवर राहू नये, असे वर्तन केल्याचा आरोपही तक्रारीत करण्यात आला आहे.
या घटनेनंतर तक्रारदाराने थेट गोवंडी पोलीस ठाण्यात धाव घेत सुशील रहेजाविरोधात तक्रार दाखल केली. तक्रारीच्या आधारे गोवंडी पोलिसांनी भारतीय न्याय संहिता २०२३ मधील कलम ११५ अंतर्गत तसेच अनुसूचित जाती व जमाती (अत्याचार प्रतिबंधक) अधिनियम १९८९ अंतर्गत गुन्हा दाखल केला आहे.
या प्रकरणानंतर मुंबईत पुन्हा एकदा मराठी–अमराठी वाद चिघळण्याची शक्यता वर्तवली जात असून, पोलिसांकडून पुढील तपास सुरू आहे. सुशील रहेजाविरोधात नेमकी कोणती कारवाई केली जाणार, याकडे सर्वांचे लक्ष लागले आहे.
